სამცხე-ჯავახეთში ტრადიციული მეღვინეობის ასოციაცია ჩამოყალიბდა

ტრადიციული მეღვინეობის ასოციაცია, რომლის დაარსების იდეის ავტორი პრეზიდენტის ადმინისტრაციის ყოფილი უფროსი ანდრო ბარნოვია, დღეს 16 თებერვალს, სამცხე-ჯავახეთშიც დაფუნძდა.

მისი დამფუძნებელი ახალციხეში მცხოვრები გიორგი ნათენაძეა, რომელიც ოჯახთან ერთად, მესხური ვაზის ჯიშების მოძიებასა და მესხური ღვინის ჩამოსხმაზე აქამდეც მუშაობდა.

გიორგი ნათენაძე ამბობს, რომ ასოციაციის მიზანი მესხური, ტრადიციული ვაზის ჯიშების მოძიება, აღდგენა, გამრავლება და პოპულარიზებაა. მას შემდეგ რაც ვაზის ჯიშებს აღადგენენ, მეღვინეებს ეკოლოგიურად სუფთა, მაღალი ხარისხის ღვინის წარმოებაშიც დაეხმარებიან: „გარდა ამისა, ჩვენს კუთხეში დაკარგულია ქვევრის ტრადიცია და გვინდა, რომ აღვადგინოთ“.

ასოციაციაში გაწევრიანება ნებისმიერ მსურველს შეუძლია. გიორგი ნათენაძე ამბობს, რომ ყველა დაინტერესებულ პირს საშუალებას მისცემენ, ვაზის მოვლისა და ღვინის დაყენების ტექნოლოგიები შეისწავლოს: „ეს იქნება ვაზის დარგვიდან, ყურძნის დაკრეფამდე. ვასწავლით ღვინის დაყენებას და დავეხმარებით პროდუქციის რეალიზებაში. გვექნება ჩვენი საკუთარი მარანი და ასევე, ვებგვერდი“.

საქართველოში ტრადიციული მეღვინეობის ასოციაციის ჩამოყალიბების იდეის ავტორი ანდრო ბარნოვი დღეს ახალციხეში გამართულ ასოციაციის პრეზენტაციასაც დაესწრო.

„ყველა რეგიონში ამ ასოციაციების დაფუძნება და შემდგომ განვითარება თავიდან ბოლომდე ეყრდნობა ინიციატივის მქონე ადამიანებს, მათ ვისაც ეს საქმე უყვარს. ბედნიერი ვარ, რომ ახალციხეში არსებობს ისეთი ადამიანი, როგორიც გიორგია. გვინდა, რომ ამ საქმეში მაქსიმალურად ბევრი ადამიანი ჩაერთოს, რადგან მესხეთი არის მეღვინეობის ერთ-ერთი უძველესი კუთხე. სამწუხაროდ, დრომ მოიტანა, რომ მეღვინეობა მაინცდამაინც განვითარებული არაა და რაც კიდევ უფრო ცუდია, მესხური ენდემური ჯიშები გაქრობის პირასაა“, - ამბობს იგი.

მისივე განმარტებით, ტრადიციული მეღვინეობის ასოციაციები თითოეულ გლეხს, მეღვინეს თუ მცირე მეწარმეს, ხელს უწყობს შეძლოს ხარისხიანი ღვინის დაყენება, რომელიც ღვინის ბაზარს გაამდიდრებს.

ნათენაძეებმა მესხური ღვინო, რომელიც სამი სხვადასხვა ჯიშის ყურძნისგან შედგებოდა, პირველად 2009 წელს ჩამოასხეს. ამ დროისთვის, მათ კოლექციაში, მესხური ვაზის დაახლოებით 24 ჯიშია.

„კიდევ ბევრი ჯიში მაქვს გაგზავნილი გამოსაკვლევად. უკვე დადასტურდა, რომ აღმოვაჩინეთ ორი ძველი მესხური ჯიში, ცხენისძუა შავი და მესხური მწვანე. გარდა ამისა, არის კიდევ ბევრი საღვინე ჯიში, რომლის იდენტიფიცირება უნდა მოხდეს მესხურ ჯიშებთან. ეს საკმაოდ ხანგრძლივი პროცესია. შემდგომ ვაპირებთ გამოვცეთ წიგნი, რომელშიც აღწერილი იქნება ყველანაირი ჯიშის ვაზი, რაც დღემდეა შემორჩენილი მესხეთში“, - ამბობს გიორგი ნათენაძე.



[თამარ თოთაძე, ახალციხე]