ახალქალაქში ევროპის დღისადმი მიძღვნილი ღონისძიებები მიმდინარეობს

ევროპის დღისადმი მიძღვნილი ღონისძიებები ახალქალაქში დღეს, 21 სექტემბერს ცენტრალურ მოედანზე 13:00 საათიდან დაიწყო.

როგორც, "ნატოსა და ევროკავშირის შესახებ საინფორმაციო ცენტრის" სამცხე-ჯავახეთის ბიუროს წარმომადგენელი თეონა ზურაბაშვილი „სამხრეთის კარიბჭესთან“ აცხადებს, ახალქალაქის ცენტრალურ მოედანზე გაშლილ კარვებში რიგდება ევროკავშირის შესახებ საინფორმაციო ბროშურები ქართულ და სომხურ ენებზე.

„გარდა ამისა, აქ მოსული სტუმრებისათვის მოეწყობა სხვადასხვა გათამაშებებიც, ასევე წიგნებსა და გზამკვლევებს დავარიგებთ. ადგილობრივი ყველა უწყება გყვავს დაპატიჟებული“,–გვითხრა თეონა ზურაბაშვილმა.

ევროპის დღე საქართველოში, ევროკავშირის წარმომადგენლობის ინიციატივთ და ახალქალაქის მერიასთან თანამშრომლობით ხორციელდება. დღეს, ახალქალაქში ევროპის დღეებს, ევროკავშირის ელჩი საქართველოში კარლ ჰარცელიც ესწრება.

ახალქალაქის ცენტრალურ მოედანზე ღონისძიებების დაწყებამდე, ევროკავშირის ელჩი ახალქალაქის სასწავლო ცენტრს სტუმრობდა და სოფელ ოკამში ევროკავშირის მიერ მხარდაჭერილი სოფლის განვითარების ინიციატივის პროექტში მონაწილე ბენეფიციარები მოინახულა.

ახალქალაქში, ევროპის დღისადმი მიძღვნილი ღონისძიებები 16:00 საათზე დასრულდება.





[ლუბა გიორგაძე, ახალქალაქი]