ახალციხეში 26 მაისის აღსანიშნავად ემზადებიან

ღონისძიების ფარგლებში, წმ. მარინეს სახელობის საკათედრო ტაძარში გაიმართება საქართველოს დამოუკიდებლობისთვის დაღუპულ მებრძოლთა სულის მოსახსენიებელი პანაშვიდი; პაატა ნათენაძისა და მერაბ კოსტავას ქუჩებზე მოეწყობა შეჯიბრი მძლეოსნობაში; ახალციხის ციხის ტერიტორიაზე გაიმართება ღვინის ფესტივალი; ასევე ციხის ტერიტორიაზე გაიმართება ხალხური რეწვის ნიმუშების გამოფენა – გაყიდვა, მხატვრების ნამუშევრების გამოფენა, შეზღუდული შესაძლებლობების მქონე პირთა ხელნაკეთი ნივთების გამოფენა და ტურნირი ჭადრაკში.

ასევე, ახალციხის ციხის ტერიტორიაზე თოჯინების თეატრი გამართავს წარმოდგენას, მოეწყობა შეჯიბრი მკლავჭიდსა და ჭიდაობაში და გაიმართება მოტო – შოუ. იგეგმება სპორტულ ღონისძიებებში გამარჯვებულების დაჯილდოვება და ახალციხის ცენტრალურ სტადიონზე საფინალო მატჩი დიდ ფეხბურთში.

16:00 საათზე, ასევე ახალციხის ციხის ტერიტორიაზე, ახალციხის ფოლკლორული ანსამბლი „მესხეთი“ და ქორეოგრაფიული ანსამბლები: „მესხეთი“, „სამცხე“, „ლომსია“, „მესხი ფრთოსანი“, სამეჯლისო სპორტული ცეკვების სტუდია „სიხარული“, საბავშვო სტუდია „პალიტრა“, კულტურის სახლის პატარა მედოლეები, ხალხურ საკრავთა გუნდი „ხმაურიანი სიმები“ და სომხური ახალგაზრდული ცენტრის ქორეოგრაფიული ანსამბლი კონცერტს გამართავენ.

19:00 საათზე კი გალა – კონცერტი დაიწყება, რომელშიც მონაწილეობას მიიღებენ ჯემალ სეფიაშვილი, ცისანა სეფიაშვილი, ბორის ბედია, ბესიკ კალანდაძე, ირმა სოხაძე, ენრიკო ჯანელიძე, ჯგუფი – „თბილისური კვარტეტი“ და კახაბერი და ხანუმები.
დამოუკიდებლობის დღის აღნიშვნა საქართველოს ჰიმნითა და ფოიერვერკით დასრულდება.

ახალციხეში დამოუკიდებლობის დღე ახალციხის მერიის ორგანიზებით და კულტურისა და ინფრასტრუქტურის სამინისტროების მხარდაჭერით ეწყობა.

[მანანა სარაშვილი, ახალციხე]