წაღვერსა და ლიკანში წყლის სისტემის რეაბილიტაცია დაიწყო

პროექტი წაღვერსა და ლიკანში ძველი რეზერვუარის რეაბილიტაციას, საქლორატოროს მოწყობას, ახალი ღია რეზერვუარის, მაგისტრალური მილსადენისა და გამანაწილებელი ქსელის მშენებლობას ითვალისწინებს.

წაღვერი-ლიკანის წყალმომარაგების სისტემის რეაბილიტაცია მიმდინარე წელს დაიწყო და მისი დასრულება 2016 წლის გაზაფხულზე იგეგმება.

რეგიონული განვითარების სამინისტროში განმარტავენ, რომ სამუშაოების დასრულების შემდეგ, წაღვერსა და ლიკანს მნიშვნელოვნად გაუუმჯობესდებათ წყალმომარაგება და სასმელი წყლის ხარისხი. ახალი სისტემით მიმდებარე სოფლების ტიმოთესუბნისა და სოფელ დაბის მოსახლეობაც ისარგებლებს.

ინფრასტრუქტურული სამუშაოები ევროპის საინვესტიციო ბანკის (EIB) ფინანსური მხარდაჭერით მიმდინარეობს და მასზე 3 მილიონ ლარზე მეტია გამოყოფილი. პროექტის ფარგლებში 120 ადამიანია დასაქმებული, მათი უმეტესობა ადგილობრივი მოსახლეა.

ბორჯომის მუნიციპალიტეტში მიმდინარე სამუშაოები, საქართველოს რეგიონული განვითარებისა და ინფრასტრუქტურის მინისტრმა ნოდარ ჯავახიშვილმა, მინისტრის პირველმა მოადგილემ ილია დარჩიაშვილმა და წყალმომარაგების კომპანიის დირექტორმა ნიკოლოზ ქიზიყურაშვილმა მოინახულეს.

[თამარ თოთაძე, ბორჯომი]