ქოლგები და ყვავილები – ილია მეორე ადიგენში

დღეს, 12 მაისს, დილიდან, ილია მეორეს არალში, წმინდა ნინოს სახელობის ტაძართან, მრევლი ყვავილებით ელოდა.

„ძალიან ბედნიერი დღეა, ყველას გვიხარია უწმინდესის ჩამობრძანება. ღმერთმა დიდხანს გვიცოცხლოს მისი თავი მთელ ქვეყანას“, – ამბობს არალში მცხოვრები ნანა მათოშვილი.

პატრიარქმა არალში მრევლი დალოცა: „ბედნიერი ვარ, რომ ვიმყოფები თქვენთან ერთად ამ წმინდა ტაძარში, რომელიც ბრწყინვალედ აგიშენებიათ. შევთხოვ უფალს, რომ მოიღოს წყალობა, სიხარული და სიყვარული თქვენ ზედა. მრავალი განსაცდელი გამოუვლია ჩვენ ქვეყანას, ღმერთი ყოველთვის იფარავდა საქართველოს ხილული და უხილავი მტრებისგან. დალოცვილი იყოს თქვენი ოჯახები, თქვენი სახლი, თქვენი კარი, თქვენი საქმიანობა“.

წმინდა ნინოს ტაძრის მოლოცვის შემდეგ, უწმინდესმა არალში შშმ ბავშვების ხელნაკეთი ნივთების გამოფენა დაათვალიერა და ბავშვები დალოცა.

იღუმენი ნატალიას თქმით, ილია მეორე სოფელ არლის ტაძარს პირველად ესტურმა: „დიდი იყო მოლოდინი სოფლის მოსახლეობის. მოსწავლეები ყვავილებით დახვდნენ, მონასტერიც და მთელი სოფელიც გახარებულია, რომ უწმინდესის მასპინძლობა მოუხდათ“.

უწმინდესს ადიგენში სტუმრობისას წვიმიანი ამინდი დახვდა. ავდრის მიუხედავად მას მრევლი უდეს ღვთისმშობლის მიძინების სახელობის ტაძართან ქოლგებით დახვდა. აქ ილია მეორემ ანდრია პირველწოდებულის ხსენების დღესთან დაკავშირებით პარაკლისი გადაიხადა.

მაცხოვრის ამაღლების ტაძრის მღვდელმსახურის, მამა ნიკოლოზის თქმით, დღეს მესხეთისთვის უდიდესი დღეა, რადგან რეგიონს უწმინდესი სტუმრობს და ასევე, აწყურის ღვთიმსშობლის ხატს მოაბრძანებენ: „მთელი კუთხე ბედნიერია, ჩვენს ეპარქიაში განსაკუთრებული სიხარულის დღეა“.

ხვალ ილია მეორე აწყურის ღვთისმშლობლის ტაძარს მოილოცავს და რეგიონს დატოვებს. უწმინდესი მესხეთს გუშინ, 11 მაისს ესტუმრა და ახალციხეში შალვა ახალციხელის სახელობის ტაძარი მოილოცა.



[თამუნა უჩიძე, ახალციხე]