ორი დღეა მესხეთს საქართველოს პატრიარქი სტუმრობს [Video]

თბილისიდან ახალციხეში მომავალ პატრიარქს მოსახლეობა გზისპირა სოფლებში ყვავილებით ხვდებოდა.

თვადაპირველად ილია მეორე ახალციხეში, შალვა ახალციხელის სახელობის მშენებარე ტაძარს ესტუმრა. მრევლი უწმინდესს ტაძრის ეზოში დახვდა. ილია მეორემ დალოცა შეკრებილები და ის ოჯახი, ვინც ტაძრის მშენებლობა წამოიწყო. შალვა ახალციხელის სახლობის მშენებარე ტაძრის მოლოცვის შემდეგ საქართველოს პატრიარქმა რეზიდენციაში გადაინაცვლა, სადაც მას მეუფე თეოდორემ უმასპინძლა.

მეორე დღეს, 12 მაისს, უწმინდესი ადიგენს ესტუმრა. მან ჯერ სოფელ არლის წმინდა ნინოს სახელობის ეკლესია მოილოცა, შემდეგ კი ამავე სოფელში შეზღუდული შესაძლებლობების მქონე მოსწავლეების ნამუშევრები დაათვალიერა.

არლიდან უწმინდესი სოფელ უდეში გაემგზავრა. აქ ილია მეორეს მრევლი ყვავილებითა და წვიმიანი ამინდის გამო, ქოლგებით ელოდა. უდეს შემდეგ საქართველოს კათოლიკოს პატრიარქი სოფელ ზარზმაში, ზარზმის მონასტერში გაემგზავრა.

ილია მეორე ხვალ აწყურის ღვთისმშლობლის ტაძარს მოილოცავს და რეგიონს დატოვებს.

[თამუნა უჩიძე, ოთარ აწყურელი, ახალციხე–ადიგენი]