მესხეთში საქართველოს კათოლიკოს პატრიარქს ელოდებიან

პატრიარქი რეგიონს ხვალ, 11 მაისს ეწვევა. სამღვდელოება და მოსახლეობა ილია მეორეს 14:00 საათზე, სლესის ციხესთან დახვდება. ხვალ პატრიარქი ჯერ ახალციხეში წმინდა შალვა ახალციხელის სახელობის მშენებარე ტაძარს ესტუმრება, შემდეგ კი მას, საეპარქიო რეზიდენციაში ახალციხისა და ტაო–კლარჯეთის მიტროპოლიტი თედორე უმასპინძლებს.

12 მაისს პატრიარქი ეპარქიის ტაძრებისა და მონასტრების მოსალოცად ადიგენში გაემგზავრება. ილია მეორე არლის წმინდა ნინოს სახელობის დედათა მონასტერს მოინახულებს და ეპარქიასთან არსებული შშმ ბავშვების ნამუშევრების გამოფენას დაათვალიერებს. იგი ასევე, უდის ღვთისმშობლის მიძინების სახელობის ტაძარს მოილოცავს, დღის ბოლოს კი უწმიდესი, უდის წმინდა ნინოს სახელობის დედათა მონასტერს მოინახულებს და ზარზმის ღვთისმშობლის მიძინების სახელობის მამათა მონასტერში გაემგზავრება.

ვიზიტის მესამე დღეს ილია მეორე აწყურის ღვთისმშობლის მიძინების სახელობის ტაძარს მოილოცავს, სადაც ასევე შესრულდება პარაკლისი.

პატრიარქი ახალციხისა და ტაო კლარჯეთის ეპარქიას 13 მაისს დატოვებს.

[ნინო ნარიმანიშვილი, ახალციხე]