აწყურის ღვთისმშობლის ხატს ახალციხეში დღეს ჩამოაბრძანებენ

ახალციხისა და ტაო–კლარჯეთის მიტროპოლიტის მეუფე თეოდორეს რეზიდენციაში განმარტავენ, რომ აწყურის ღვთისმშობლის ხელთუქმნელ ხატს ხულოს მუნიციპალიტეტიდან შემოაბრძანებენ.

„სავარაუდოდ ხატი დღის ბოლოსთვის იქნება მაცხოვრის ამაღლების ტაძარში“, – ამბობს დედა ნატალია.

აწყურის ღვთისმშობლის ხელთუქმნელი ხატის ასლი ახალციხეში დილამდე დარჩება. ხვალ, 13 მაისს კი ხატს აწყურის ღვთისმშობლის მიძინების სახელობის ტაძარში დააბრძანებენ, სადაც საზეიმო წირვას ახალციხისა და ტაო–კლარჯეთის მიტროპოლიტი მეუფე თეოდორე აღავლენს.

საზეიმო წირვა აწყურში 10:00 საათზე დაიწყება.

შეგახსენებთ, რომ აწყურის ღვმთისმშობლის ხატით მსვლელობა ოფადან (თურქეთი) დაიწყო, 10 მაისს ხატი ბათუმში შეაბრძანეს,11 მაისს ხულოში, ახალციხის და აწყურის შემდეგ 13 მაისს (საღამო) ხელთუქმნელი ხატის ასლს ბორჯომში ჩააბრძანებენ. 14 მაისს ხაშურში, 15 მაისს გორში, 16 მაისს კი ხატს თბილისში, სვეტიცხოვლის სახელობის ტაძარში დააბრძანებენ.

17 მაისს 12:00 საათზე დაიწყება მსვლელობა ვარდების მოედნიდან სამების საკათედრო ტაძრამდე, სადაც კათოლიკოს-პატრიარქი გადაიხდის პარაკლისს და მრევლს დალოცავს.

[თინათინ ზაზაძე, ახალციხე]