ივანიშვილის დაპირებები სამცხე-ჯავახეთს

“ძლიერი სოფელი ძლიერი ქვეყნის საწინდარია. ”ქართულ ოცნებას” დაგეგმილი აქვს ააღორძინოს ქართული სოფელი და ამისათვის შექმნას ერთ მილიარდიანი ფონდი. ამ ფონდის დახმარებით სოფლის მეოურნეობაში დასაქმებული ადამიანები გრძელვადიანი და შეღავათიანი სესხებით ისარგებლებენ. დღეს სოფლის მეურნეობა ერთადერთი დარგია, რომელიც სამცხე-ჯავახეთს ასაზრდოებს. თუმცა, ამ მხრივაც დიდი პრობლემები აქვს. იყო დრო, როცა სამცხე-ჯავახეთში ვაზი დიდ კულტურად ითვლებოდა, აქაური ვაზი გამძლეობითა და მაღალი საგემოვნო თვისებებით გამოირჩეოდა, სამწუხაროდ არაერთი უნიკალური ჯიში გადაშენების პირასაა მისული”, - განაცხადა ბიძინა ივანიშვილმა.

მისი თქმით, მომავალ წელს სოფლის მეურნებაში დასაქმებული ყველა ადამიანი უფასოდ მიიღებს ელიტური ჯიშის კარტოფილს, რაც რამდენჯერმე გაზრდის მოსავლიანობას: ”ჩვენ შევძლებთ ქართული პროდუქციის რუსულ ბაზარზე დაბრუნებას, რაც აუცილებელია ქართული წარმოების აღორძინებისათვის. ჩვენ ავითვისებთ ახალ ბაზრებსაც და გპირდებით, რომ მოყვანილი მოსავალი გაუყიდავი არ დარჩება”.

კოალიციის ლიდერის თქმით, თუ ადამიანის დახმარება გინდა, ფულით კი არ უნდა დაეხმარო, არამედ ფულის შოვნის კანონიერი საშუალება უნდა მისცე.

”არასოდეს დამითვლია, რამდენს ვიხდიდი ჩემი ქვეყნის დასახმარებლად, მაგრამ ახლა, როცა დამანგრევლობას მწამებენ, უნდა გითხრათ, რომ სხვადასხვა საქველმოქმედო მიზნით, ჩემ მიერ გაღებული თანხით, ხელისუფლების მაღალ-მაღალი ხელფასები რიგდებოდა, შენობები შენდებოდა, რემონტდებოდა პოლიცია და ჯარსაც ვეხმარებოდით. გაჭირვებულებს ხელს ვუმართავდით, მაგრამ საბოლოოდ ქვეყანასა და ხალხს მაინც ვერაფერი ვუშველე. სააკაშვილმა ისე დააძაბუნა ქვეყანა, რომ გაჭირვებულ ადამიანს საბჭოეთი მოენატრა. ამაზე უარესი რა უნდა დამართო თავისუფლებისა და ღირსების მოყვარე ხალხს. დავრწმუნდი იმაში, რომ ჩემი დახმარება თავისთვის გამოიყენეს და დავრწმუნდი იმაშიც, რომ მხოლოდ ეს არის ნამდვილი დახმარება და მე ამის გასაკეთებლად მოვედი”.

[თამარ თოთაძე, ახალციხე]