ვანო მერაბიშვილი - ”ჩემი მიზანია გავაორმაგო საქართველოს სოფლის მეურნეობის პროდუქცია”

”ჩვენი გეგმა ოთხპუნქტიანია და პირველი, რასაც ჩვენ გავაკეთებთ, თითოეულ ოჯახს გადავცემთ ათასლარიან ვაუჩერს. ჩვენ მიზნობრივ დახმარებას აქამდეც ვეწეოდით, მაგრამ ჩვენ ვთვლით, რომ თითოეულმა მოქალაქემ თვითონ უკეთ იცის, როგორ გამოიყენოს ის სიკეთე, რომელსაც ჩვენ თითოეულ ოჯახს გადავცემთ”, - ამ სიტყვებით დაიწყო გამოსვლა საქართველოს პრემიერმა.

მან სოფლის განითარებაზე გაამახვილა ყურადღება.

”მე ვიცი როგორ უჭირს ქართულ სოფელს და მე ვაძლევ მათ პირობას, რომ თითოეული სოფელი იგრძნობს ყურადღებას და თანადგომას საქართველოს მთავრობისაგან. ყველა სოფელს ექნება წყალი, გზა, ინტერნეტი.საქართველოში დასრულდება დენის გამრიცხველიანება, გაზის რეაბილიტაცია, ჩვენ საქართველოში გავაშენებთ 500 ახალ საწარმოს. ჩვენ საქართველოში დამატებით 90 000 ჰექტარს მოვრწყავთ, ჩვენ საქართველოში ვიყიდით დამატებით 2000 აგრეგატს, ტრაქტორს და კომბაინს, რათა სოფლის მეურნეს ჰქონდეს საშუალება დაამუშაოს მიწის ნაკვეთი. ჩვენ დავეხმარებით გლეხებს რათა ჭარბი სასოფლო პროდუქცია გაიტანონ ქვეყნის გარეთ. ჩემი მიზანია გავაორმაგო საქართველოს სოფლის მეურნეობის პროდუქცია. ჩემი მიზანია რომ თითოეული ქართველი გლეხი გამდიდრდეს, თუ ქართველი გლეხი იქნება ძლიერი, ძლიერი იქნება საქართველოც”, - განაცხადა პრემიერმა.

[თამარ თოთაძე, ნინო ნარიმანიშვილი, ახალციხე]