ახალციხეში მოსახლეობას მაჟორიტარებმა მიმართეს

ახალციხეში შეკრებილ მოსახლეობას რეგიონის მაჟორიტარმა კანდიდატებმა მიმართეს.

ახალციხის მაჟორიტარმა კანდიდატმა ვაჟა ჩიტაშვილმა შეკრებილ მოსახლეობას მხარდაჭერისთვის მადლობა გამოუცხადა. დღეს ისტორიული უწოდა და განაცხადა, რომ ხელისუფლების მიერ განხორციელებულ რეფორმებზე საუბარს არ აპირებს.

”არ ვსაუბრობ იმიტომ, რომ ამ რეფორმების დადებითი შედეგი ყველა ჩვენგანმა, ყველა ოჯახმა კარგად იცის. არ ვაპირებ ამ რეფორმებზე საუბარს, ვინაიდან ჩვენ ხელისუფლებას გააჩნია ახალი, უფრო მობილური და ძლიერი პროგრამა და ეს პროგრამა მდგომარეობს იმაში, რომ უნდა იყოს ძლიერი სოფელი, ყველა ადამიანს უნდა ჰქონდეს დასაქმების უფლება დ ამის საფუძველი ჩვენ უნდა შევქმნათ. მეტი სარგებელი უნდა მივიღოთ ყველა ადამიანმა”, - განაცხადა ახალციხის მაჟორიტარმა კანდიდატმა.

მისივე თქმით, ხელისუფლების სიძლიერე იმ ფაქტშიც ჩანს, რომ ოპერატიულად შეძლეს ივლისში სამცხე-ჯავახეთში სტიქიით დაზარალებული მოსახლეობის დახმარება.

”ჩვენი ხალხი ყოველთვის გამორჩეული იყო სამშობლოს სიყვარულით, კარგი სწავლით, ტავდადაებით. დამეთანხმებით, რომ არც ჩვენ ხელისუფლებას დაუკარგავს ეს თვისება. ამიტომაც მოგიწოდებთ ყველას, მხარი დაუჭიროთ მმართველ პარტიას და ეს იქნება მხარდაჭერა ჩვენი ქვეყნის ნათელი მომავლისა”.

ვაჟა ჩიტაშვილის შემდეგ სცენაზე რეგიონის სხვა რაიონების მაჟორიტარი კანდიდატები გამოჩნდნენ.

[ნინო ნარიმანიშვილი, ახალციხე]