”ყველაფერს გავაკეთებთ იმისათვის, რომ ჩვენმა მოქალაქეებმა შეძლონ ქართულად ლაპარაკი”

თამარ მეფის ძეგლის მიმდებარე ტერიტორიაზე დამონტაჟებულ სცენაზე ბიძინა ივანიშვილი დღის ხუთ საათზე გამოჩნდა.

ივანიშვილმა გამარჯვების შემთხვევაში პარტიის სამომავლო გეგმებზე ისაუბრა და აღნიშნა, რომ არაქართულენოვან სკოლებში ქართული ენის სწავლების დონე ამაღლდება და შეიქმნება ქართული ენის შემსწავლელი კურსები უფროსი თაობის ადამიანებისთვის. საჭიროების შემთხვევაში კი ამუშავდება თარჯიმანთა და მთარგმნელთა ქსელი. ამასთანავე, სახელმწიფო იმასაც მიხედავს, რომ არაქართველმა ბავშვებმა საფუძვლიანად შეისწავლონ მშობლიური ენა.

”დღეს ჩვენს შორის არიან ადამიანები, რომელბმაც სავარაუდოდ კარგად არ იციან ქართული ენა და ძნელი წარმოსადგენი არ უნდა იყოს ამის გამო რამდენად გართულებული უნდა იყოს მათთვის ცხოვრება. არ შეიზლება კაცს ეს არ აწუხებდეს, რადგან ძნელია შენი ქვეყნის სრულფასოვან წევრად იგრძნო თავი. არავინ იფიქროს, რომ მე ამ ადამიანებს განვიკითხავ, ეს სახელმწიფოს გადასაწყვეტი პრობლემაა, სახელმწიფომ უნდა იზრუნოს ყველა თავის მოქალაქეზე. სახელმწიფომ ხელი უნდა შეუწყოს საკუთარ ქვეყანაში მისი ყოველი მოქალაქის ინტეგრაციას. რამდენიმე ათეული წლის განმავლობაში მრავალი პროექტი დაიგეგმა და თითქოს განხორციელდა კიდეც სახელმწიფო ენის შესასწავლად, მაგრამ პირი არ უჩანს ამ საკითხის მოგვარებას. ბევრი ჩვენი მოქალაქისათვის კვლავ პრობლემად რჩება სახელმწიფო ენის არცოდნა. ”ქართული ოცნება” გპირდებათ, რომ ყველაფერს გავაკეთებთ იმისათვის, რომ ჩვენმა მოქალაქეებმა შეძლონ ქართულად ლაპარაკი, შეძლონ ამ ქვეყნის განვითარებაში სრულფასოვნად მონაწილეობა და ამასთან ერთად, ჩვენ ხელს შევუწყობთ მათი მშობლიური ენის განვითარებას”.

[თამარ თოთაძე, ახალციხე]