ეთნიკურმა უმცირესობებმა ქართული ენის ცოდნის დამადასტურებელი სერთიფიკატები მიიღეს

ქართული ენის ცოდნის დამადასტურებელი სერთიფიკატი ელიტა აივაზიანს, ჟვანიას სკოლის ადმინისტრაციის წარმოამდგენლებმა გადასცეს. ელიტა სოფელ წყალთბილიდანაა. კურსებზე სამი თვის განმავლობაში დადიოდა. ქართული უკვე A2 დონეზე იცის.

„ჩემი აზრით, ყველა ადამიანმა, ვინც საქართველიში ცხოვრობს, ქართული ენა უნდა იცოდეს. სკოლაში რაც ვისწავლე, სტუდენტობაში დამავიწყდა. გავიგე, რომ კარგი მასწავლებელი მოვიდა სოფელში და მივედი. სიამოვნებით დავდიოდი გაკვეთილებზე. საქართველოში ვცხოვრობ და საჭიროა ენის ცოდნა“, - ამბობს ელიტა.

ჟვანიას ადმინისტრირების სკოლის საგანამანთლებლო პროგრამაში სხვადასხვა პროფესიული და ასაკობრივი ჯგუფის წევრები სწავლობდნენ. მათმა ნაწილმა A1, ნაწილმა კი A2 დონის სერთიფიკატი მიიღო. სოფელ წყრუთში მცხოვრები ოგანეს ადამიანი ამბობს, რომ როგორც საქართველოს მოქალაქე ქართულის ცოდნა ძალიან ხშირად სჭირდებოდა.

„მე, როგორც საქართველოს მოქალაქე ვთვლი, რომ აუცილებელია ქართულის სწავლა და ძალიან კმაყოფოლი ვარ. ენის ცოდნის უმცირესობისთვის დამატებითი შანსია, რომ კარგად ინტეგრირდე საქართველოში. დიდი სიამოვნებით დავდიოდი და კიდევ ვივლი, როცა კურსები იქნება“.

პროგრამაში ჩართული იყვნენ ასპინძის სოფელ დამალას სკოლის პედაგოგებიც. ქართულის შემსწავლელი კურსები თავად სკოლის დირექტორმაც გაიარა: „მადლობა, რომ დღეს ვგრძნობთ თავს სახელმწიფოს სრულფასოვან წევრად. მოხდება ჩვენი ადაპტაცია და ინტეგრირება ქართულ საზოგადოებაში. შევძლებთ ჩვენი უნარების, პოტენციალისა და შესაძლებლობების სრულფასოვან რეალიზებას“, - ამბობს სკოლის დირექტორი ნელი დუდუხჩიანი.

ჟვანიას ადმინისტრირების სკოლა ქართული ენის შემსწავლელ კურსებს მთელი საქართველოს მასშტაბით ახორციელებს, მათ შორის, სამცხე-ჯავახეთის სხვადასხვა სოფელში. პროგრამაში ჩართვის მსურველები პრე-ტესტს გადიან, რომლის მიხედვითაც, მათი დონე მოწმდება.

„ჩვენ მივეცით შესაძლებლობა და შევუქმენით პირობა, რომ მათ სრულფასოვნად გაევლოთ ქართული ენა იმ კონკრეტულ დონეზე, რა სასტარტო მონაცემებიც ჰქონდათ. ჯგუფს იმის მიხედვით ვაკომპლექტებთ, რა შედეგიც აქვს მონაწილეს პრე-ტესტში. ნულიდან იწყებს სწავლას, თუ აქვს გარკვეული ცოდნა და კომპეტენცია. ასევე ჩვენ ვთავაზობთ სახელმწოიფო ენის პროგრამას 20 პროფესიული მიმართულებით“, - ამბობს ჟვანიას სახელობის ადმინისტრირების სკოლის დირექოტრი ქეთევან ჯაყელი.

ზურაბ ჟვანიას სახელობის სახელმწიფო ადმინისტრირების სკოლა სახელმწიფო ენის სწავლების პროგრამას, 2014 წლიდან ახორციელებს. ჯამში, ამ პროგრამის ფარგლებში, 12 413 ბენეფიციარია გადამზადებული.

ამავე თემაზე:

ვინ მოამზადებს ქართული ენის სწავლის მსურველ არაქართულენოვან პედაგოგებს





[თაკო ფეიქრიშვილი, ახალციხე]