გადამზადებულ საჯარო მოხელეებს სერთიფიკატები გადაეცათ

სამცხე–ჯავახეთის შვიდი მუნიციპალიტეტის 70–მდე საჯარო მოხელეს ტრენინგი ზურაბ ჟვანიას სახელობის სახელმწიფო ადმინისტრირების სკოლის ტრენერებმა ჩაუტარეს.

"სამცხე–ჯავახეთის ყველა მუნიციპალიტეტი გადადის ელექტრონულ საქმისწარმოებაზე. დღეს გვყავს გადამზადებული თანამშრომლები, რომლებიც თავისუფლად შეძლებენ ამ პროგრამის გამოყენებას და ამ პროგრამის მეშვეობით საქმისწარმოების განხორციელებას", – ამბობს ჟვანიას სახელობის სახელმწიფო ადმინისტრირების სკოლის დირექტორი ქეთევან ჯაყელი.

საჯარო მოხელეებმა გადამზადება სამცხე–ჯავახეთის გუბერნიის ინიციატივით გაიარეს. დღეს, 25 მარტს სერთიფიკატები ქალაქ ახალციხის მერიისა და ახალციხის მუნიციპალიტეტის გამგეობის 24–მა საჯარო მოხელემ მიიღო. რეგიონის დანარჩენ მუნიციპალიტეტებში გადამზადებულ საჯარო მოხელეებს სერთიფიკატებს ჟვანიის სკოლის წარმომადგენლები 26 და 27 მარტს გადასცემენ.

"აღნიშნული პროგრამის განხორციელებაში ფინანსთა სამინისტრომ შეგვიწყო ხელი. ეს არის მოქნილი პროგრამა, რომლის საშუალებითაც მენეჯერს შეუძლია ონლაინ–რეჟიმში უყუროს თუ რა მდგომარეობაშია ესა თუ ის დოკუმენტაცია და გაუწიოს კონტროლი", – ამბობს სამცხე–ჯავახეთის გუბერნატორი აკაკი მაჭუტაძე.

საქმისწარმოების ავტომატიზებული სისტემა არის საჯარო დაწესებულებებში საქმისწარმოებისა და დოკუმენტბრუნვის ერთ–ერთი ყველაზე ინოვაციური, სრულყოფილი და პროგრესული პროდუქტი, რომლის მიზანია საქმისწარმოების პროცესების მაქსიმალური გამარტივება, ხელმისაწვდომობა და კომპიუტერიზაცია. სისტემა უზრუნველყოფს საოფისე დოკუმენტაციის ეფექტურ ელექტრონულ მართვას და დოკუმენტებზე სწრაფ წვდომას.

[თამარ თოთაძე, ახალციხე]