საჯარო მოხელეები დოკუმენტაციის ელექტრონულ მართვას სწავლობენ

საჯარო მოხელეებს ტრენინგებს ზურაბ ჟვანიას სახელობის სახელმწიფო ადმინისტრირების სკოლა უტარებს.

„ელექტრონულ საქმისწარმოებაზე გადასვლასთან დაკავშირებით, ჩვენმა სკოლამ აიღო ვალდებულება, რომ სწავლების კომპონენტი უზრუნველყოს შვიდივე თვითმმართველი ერთეულის მოხელეებისთვის ამ რეგიონში. ტრენინგის მონაწილეები ისწავლიან როგორ მართონ ეს პროგრამა, როგორ გამოიყენონ და როგორ უზრუნველყონ ელექტრონული საქმის წარმოება“, – განმარტავს ზურაბ ჟვანიას სახელობის სახელმწიფო ადმინისტრირების სკოლის დირექტორი ქეთევან ჯაყელი.

ადგილობრივი თვითმმართველობის საჯარო მოხელეებისთვის ტრენინგი სამ ეტაპად ჩატარდება, სამცხე–ჯავახეთის უნივერსიტეტსა და უშუალოდ მუნიციპალიტეტების ადმინისტრაციულ ერთეულებში.

ტრენინგის ფარგლებში სამცხე–ჯავახეთის მუნიციპალიტეტების 70 თანამშრომელი გადამზადდება.

„ყველა მუნიციპალიტეტი მოკლე ხანში გადავა ელექტრონულ საქმისწარმოებაზე, რაც ყველა საჯარო მოხელეს გაუადვილებს საქმიანობას. ამისთვის ჩვენ მოვიწვიეთ ჟვანიას სკოლის წარმომადგენლები, რათა ყველა საჯარო მოხელემ ისწავლოს და შემდეგ თავისუფლად აწარმოოს საბუთების დოკუმენტბრუნვა“, – ამბობს სამცხე–ჯავახეთის გუბერნატორის მოადგილე ავთანდილ კაჭკაჭაშვილი.

საქმისწარმოების ავტომატიზებული სისტემა არის საჯარო დაწესებულებებში საქმისწარმოებისა და დოკუმენტბრუნვის ერთ–ერთი ყველაზე ინოვაციური, სრულყოფილი და პროგრესული პროდუქტი, რომლის მიზანია საქმისწარმოების პროცესების მაქსიმალური გამარტივება, ხელმისაწვდომობა და კომპიუტერიზაცია. სისტემა უზრუნველყოფს საოფისე დოკუმენტაციის ეფექტურ ელექტრონულ მართვას და დოკუმენტებზე სწრაფ წვდომას.



[თამარ თოთაძე, ახალციხე]