სამცხე–ჯავახეთში ადგილობრივი თვითმმართველობის მოხელეებს გადაამზადებენ

საჯაო მოხელეებისთვის ტრენინგს, 10 მარტს, ჟვანიას სახელობის სახელმწიფო ადმინისტრირების სკოლა ჩაატარებს.

საქართველოს განათლებისა და მეცნიერების სამინისტროს სსიპ პირი ზურაბ ჟვანიას სახელობის სახელმწიფო ადმინისტრირების სკოლა, მუნიციპალიტეტებში დასაქმებული ადგილობრივი თვითმმართველობის მოხელეების გადამზადებას “საქმისწარმოების ავტომატიზებული სისტემის (edocument) ოპერირების სასწავლო კურსის ფარგლებში, სამცხე–ჯავახეთის სამხარეო ადმინისტრაციასთან თანამშრომლობითა და სამცხე–ჯავახეთის უნივერსიტეტთან პარტნიორობით ახორციელებს.

საქმისწარმოების ავტომატიზებული სისტემა არის საჯარო დაწესებულებებში საქმისწარმოებისა და დოკუმენტბრუნვის ერთ–ერთი ყველაზე ინოვაციური, სრულყოფილი და პროგრესული პროდუქტი, რომლის მიზანია საქმისწარმოების პროცესების მაქსიმალური გამარტივება, ხელმისაწვდომობა და კომპიუტერიზაცია. სისტემა უზრუნველყოფს საოფისე დოკუმენტაციის ეფექტურ ელექტრონულ მართვას და დოკუმენტებზე სწრაფ წვდომას.

ტრენინგი ჩატარდება სამ ეტაპად, სამცხე–ჯავახეთის უნივერსიტეტსა და უშუალოდ მუნიციპალიტეტების ადმინისტრაციულ ერთეულებში. გადამზადდება ადგილობრივი თვითმმართველობის 70 მოხელე.

ტრენინგის ფარგლებში ასევე მოხდება ხუთასამდე ადგილობრივი თვითმმართველობის მოხელის ცნობიერების ამაღლება აღნიშნულ საკითხთან დაკავშირებით.

[sknews.ge]