მეხუთე სკოლას ახალი კორპუსი შეემატა

მეხუთე სკოლის დამატებითი კოროპუსი განათლების სამინისტროს დაფინანსებით, 5 თვეში აშენდა. მშენებლობა ერთ მილიონ ლარამდე დაჯდა.

სკოლის დირექტორი ჟენია მერაბიშვილი ახალი კორპუსის საჭიროებას მოსწავლეების სიმრავილით ხსნის.

სამსართულიანი შენობა 200 მოსწავლეზეა გათვლილი. აქ ძირითადად ის კლასები ისწავლიან, რომლებიც გაძლიერებულად სწავლობენ საბუნებისმეტყველო საგნებს. კორპუსში 11 საკლასო ოთახია და თითქმის ყველა შესაბამისი ლაბორატორიითაა აღჭურვილი.

”ჩვენი სკოლის ისტორიაში ერთი ფურცელი გადაიშალა და უკვე ჩაიწერა. ჩვენ სკოლაში ისწავლიან ჩვენი მოსწავლეები და ეს ძალიან ბევრს გვავალდებულებს ჩვენო მოსწავლეებო, მასწავლებლებო, იმიტომ რომ ახალი ინფრასტრუქტურა ძალიან კარგად აისახება ჩვენს ყოველდღიურობაზე”, - მიმართა სკოლის დირექტორმა შეკრებილებს.

ეს პირველი სკოლაა, რომელიც ხატია დეკანოიძემ მინისტრის რანგში გახსნა. მისი განცხადებით, წელს საქართველოს მასშტაბით ათამდე ახალი და რამდენიმე ათეული სრულიად რეაბილიტირებული სკოლა და 90 მომავლის კლასი იხსნება.

”მინისტრის თანამდებობაზე პირველი სკოლაა, რომელსაც ვხსნი. უაღრესად სასიამოვნო და საპასუხისმგებლოა. ვფიქრობ, რომ ნამდვილად მნიშვნელოვანია ასეთი სახის სკოლები, ასეთი სახის კლასები, თავისი ლაბორატორიებით, სადაც უნდა ისწავლონ ბავშვებმა”,- განცხადა ხატია დეკანოიძემ.

დღესვე სკოლის ეზოში ილია ჭავჭავაძის ძეგლიც გაიხსნა, რომლის ავტორი გიორგი ჩალაძეა.

მეხუთე სკოლა ამ დრომდე ორი კორპუსისგან შედგებოდა. ამათგან, ერთი დაწყებითი საფეხური, მეორე კი უფროსკლასელებისთვის იყო განკუთვნილი.

გახსნის ღონისძიება სკოლის ანსამბლების კონცერტის ფონზე მიმდინარეობდა. სკოლის ერთ-ერთმა პედაგოგმა წაიკითხა ლექსიც, რომელიც სკოლის დირექტორს ეძღვნებოდა.

[sknews.ge]