ახალციხის მეხუთე სკოლის მოსწავლეები დასუფთავების აქციაში თანატოლებს იწვევენ

იდეა, მთავრობის გადაწყვეტილებას უკავშირდება, რომლის მიხედვითაც პირველი ოქტომბრიდან პოლიეთილენის პარკების გამოყენება ეტაპობრივად, 2019 წლის გაზაფხულიდან კი საერთოდ აიკრძალება.

„მნიშნველოვანია ჩვენმა შვილბმა გაიაზრონ ის, თუ რა არის ამ აკრძალვის არსი, იცოდნენ თუ რა ზიანს აყენებს ის ბუნებას და გარემოს, რომელშიც ვცხოვრობთ. ხეობის დასუფთავებისას ავუხსენით მათ ამ კანონის მნიშვნელობა და გვინდა, რომ ეს ყოველდღიურ ცხოვრებაში დანერგონ – არ დააბინძურონ გარემო, მითუფრო პოლიეთილენისა და პლასტმასის ნარჩენებისგან“, – ამბობს იდეის ერთ–ერთი ავტორი და ორგანიზატორი, მშობელი ნინო ლაზარაშვილი.

ურავლის ხეობის დასასუფთავებლად და მეხუთე საჯარო სკოლის მეშვიდე კლასის მოსწავლეები დამრიგებელთან და მშობლებთან ერთად დღეს, 30 სექტემბერს, დილიდან წავიდნენ.

„ყველა ერთად მივდივართ დასასუფთავებლად. მერე ჩვენ გამოვიწვევთ სხვა კლასებს იქიდან და ისინი დაასუფთავებენ სხვა ტერიტორიას. რაც ბევრი ჩვენი ტოლი ჩაერთვება ამ აქციაში, მითუფრო სუფთა გარემო გვექნება“, – ამბობს მეშვიდე კლასის მოსწავლე ლუკა ალიევი.

დასუფთავების აქციაში თანატოლების გამოწვევა რომ სხვა სკოლებისთვისაც გადამდები იქნება ამაზე საუბრობს ლუკას კლასელი ირაკლი კაჭკაჭაშვილიც: „ხალხი რასაც ყრის ბუნებაში, იმათ ჩვენ ავკრეფთ და მოვუწოდებთ ყველას, რომ მომავალში აღარ დაყარონ“.

დასუფთავების აქციაში მოსწავლეების ჩართულობის მნიშვნელობაზე საუბრობს მეშვიდე კლასის დამრიგებელი შორენა ცინაძე: „პოლიეთილენი ბუნებას ძალიან აბინძურებს, რადგან ის არ იხრწნება. ყველა ქართველის და მსოფლიოს ყველა ადამიანის ვალია, რომ ბუნებას გაუფრთხილდეს“.

ურავლის ხეობის დასუფთავების შემდეგ მეხუთე საჯარო სკოლის მეშვიდე კლასის მოსწავლეებმა აქციაში მეორე საჯარო სკოლის მეხუთე კლასი დამრიგებელთან ანა მიქელაძესთან ერთად, მეხუთე საჯარო სკოლაში მერვე კლასი დამრიგებელთან ნანა დათაშვილთან ერთად და პირველ საჯარო სკოლაში მეშვიდე კლასი დამრიგებელთან დიანა მახარაშვილთან ერთად გამოიწვიეს. ჩამოთვლილი კლასები, მას შემდეგ რაც დაბინძურებულ გარემოს დაასუფთავებენ, აქციაში სხვა სკოლების სხვა კლასებს გამოიწვევენ.





[თორნიკე ზაზაძე, ახალციხე]