ყოფილ სამხედრო დასახლებაში მერია პატარა ქალაქს გააშენებს

ახალციხეში, ყოფილ სამხედრო დასახლებას 20 ჰექტრამდე ტერიტორია უკავია. დაახლოებით ოთხ ჰექტარზე სამი ოთხსართულიანი კორპუსი დგას, ტერიტორიის ნაწილზე შინაგან საქმეთა და იუსტიციის სამინისტორებმა და შემოსავლების სამსახურმა საკუთარი თანამშრომლებისთვის ორი, 9–სართულიანი კორპუსი ააშენა. დანარჩენი ტერიტორია კი, სადაც რამდენიმე მიტოვებული და გაუქმებული შენობაა, აუთვისებელია.

ახალციხის მერია ყოფილი სამხედრო დასახლების ნაწილზე ხუთი ახალი საცხოვრებელი კორპუსის, სამცხე – ჯავახეთის სახელმწიფო უნივერსიტეტის სტუდენტებისთვის საერთო საცხოვრებელის, კულტურის ცენტრის, 25–ადგილიანი მუნიციპალური საავადმყოფოსა და უსახლკარო ოჯახებისთვის საცხოვრებელი ბინების გაკეთებას გეგმავს.

„ინვესტორები მზად არიან, რომ აღნიშნულ ტერიტორიაზე ხუთი კორპუსი ააშენონ, ბინებს შეღავათიან ფასებში გავყიდით. ასევე ტერიტორიის ნაწილს საერთო საცხოვრებლისთვის უნივერსიტეტს გადავცემ, ვაპირებ კულტურის ცენტრის გახსნასაც. იქ არის ლაზარეთი, სადაც შეიძლება მუნიციპალური საავადმყოფოს გაკეთებაც, გარდა ამისა ჩვენ ქალაქში ძალიან ბევრი უბინაო ოჯახები გვყავს, რომლებსაც ერთ – ერთ შენობას დავუთმობთ, გავურემონტებთ და შევასახლებთ“, – ამბობს ქალაქ ახალციხის მერი გიორგი კოპაძე.

მერია სამხედრო დასახლებაში დაგეგმილი სამუშაოების განხორციელებას კი მას შემდეგ დაიწყებს, როცა სახელმწიფო აღნიშნულ ტერიტორიას საკუთრებაში გადაცემს. ეკონომიკის სამინისტროს ტერიტორიის მოთხოვნით ოთხი წერილი უკვე გაუგზავნა.

„ეკონომიკის სამინისტრომ მოგვწერა, რომ აღნიშნული ქონება შინაგან საქმეთა სამინისტროს ეკუთვნოდა. მერე მოხდა ამ ტერიტორიის ორად გაყოფა, ზედა ნაწილი სახელმწიფოს ბალანსზე გადავიდა, ქვედა ისევ შინაგან საქმეთა სამინისტოს საკუთრებად დარჩა. თუმცა ამ ქვედა ნაწილის კიდევ ნაწილი უზურფრუქტის წესით სასაზღვრო პოლიციას აქვს აღებული“, – ამბობს მერიის ეკონომიკის განვითარებისა და ქონების მართვის სამსახურის უფროსი როინ თაქთაქიძე და ამატებს, რომ ბოლო გაგზავნილ წერილზე პასუხი უკვე მიიღეს: „როგორც დაგვპირდნენ, აღნიშნული დასახლების ზედა ნაწილს, რომელიც სახელმწიფოს ეკუთვნის, გადმოგვცემენ, რაც შეეხება ტერიტორიის ქვედა ნაწილს, ამ ეტაპზე სასაზღვრო პოლიციამ მის გადმოცემაზე უარი განაცხადა“.

ის ტერიტორია, რომელიც შესაძლებელია ქალაქ ახალციხის მერიის ბალანსზე გადავიდეს, თაქთაქიძის თქმით, 80.965 კვადრატულ მეტრს შეადგენს.

სამხედრო დასახლება, ეგრეთ წოდებული, “პაგრანატრიადი” 60-იანი წლების ბოლოს გაშენდა. დასახლება საბჭოთა კავშირის სასაზღვრო ჯარს ეკუთვნოდა და ტერიტორიაზე შესვლა მხოლოდ იქ მცხოვრებლებისთვის იყო ნებადართული.

სამხედრო დასახლებაში რუსი ოფიცრები ოჯახებთან ერთად ცხოვრობდნენ. მათი საცხოვრებელი კორპუსების გარდა, ამ ტერიტორიაზე შტაბები, “კაზარმები” და სხვა სამხედრო შენობები იყო განთავსებული. ტერიტორია “რუსის ჯარის” მიერ 90-იან წლებამდე კონტროლდებოდა.

[მანანა სარაშვილი, ახალციხე]