ნაგავმზიდები ისევ შუა ქალაქში დგას

ახალციხეში შპს "კეთილმოწყობის" დასუფთავების მანქანები ისევ მებაღიშვილის ქუჩაზე დგას. ქალაქ ახალციხის მერმა გიორგი კოპაძემ მიმდინარე წლის 13 მარტს "სამხრეთის კარიბჭეს" განუცხადა, რომ ნაგავმზიდების გადაყვანას სახანძრო – სამაშველო სამსახურის ეზოში აპირებდნენ. თუმცა, ამდრომდე დასუფთავების მანქანები ისევ შუა ქალაქში დგას.

ახალციხის მერიაში აცხადებენ, რომ სახანძრო – სამაშველო სამსახურის ტერიტორია, სადაც ნაგავმზიდებისთვის ავტოფარეხის გაკეთება იგეგმებოდა მიმდინარე წლის დასაწყისში შინაგან საქმეთა სამინისტროს გადაეცა.

"2015 წლის დასაწყისში გამოვიდა დადგენილება, რომ მუნიციპალიტეტებში არსებული სახანძრო – სამაშველო სამსახურის ტერიტორიები უზურფუქტის წესით შინაგან საქმეთა სამინისტროს უნდა გადასცემოდა, მათ შორის ახალციხეშიც. ჩვენ გვინდოდა, რომ შსს –სთვის მხოლოდ აღნიშნული ტერიტორიის ნაწილი გადაგვეცა, მაგრამ ამაზე არ დაგვთანხმდნენ", – ამბობს ახალციხის მუნიციპალიტეტის მერიის ეკონომიკის განვითარებისა და ქონების მართვის სამსახურის უფროსი როინ თაქთაქიძე.

მისივე თქმით, მას მერე მერიამ კიდევ რამდენიმე ტერიტორიის გადაცემაზე მიიღო უარი: "ასევე გვინდოდა, რომ საბარგო სადგურის ტერიტორიაზე გადაგვეყვანა აღნიშნული ნაგავმზიდები, თუმცა სახელმწიფოს მხრიდან ამაზეც უარი მივიღეთ, ასევე უარი გვითხრეს ყოფილი სასაზღვრო ტერიტორიის გადმოცემაზეც".

მერიაში აცხადებენ, რომ ნაგავმზიდებისთვის ადგილს ეძებენ: "გვინდა, რომ დასუფთავების ავტომანქანებისთვის ავტოფარეხი მოსახლეობისგან შორს გავაკეთოთ, მაგრამ აუცილებლად ქალაქში, რადგან მძღოლებს ძალიან გაუჭირდებათ ყოველ დილით და საღამოს ქალაქ გარეთ მისვლა", – ამბობს ახალციხის მერის მოადგილე ზაზა გელაძე.

შეგახსენებთ, რომ შპს "კეთილმოწყობის" ნაგავმზიდები, რომლებითაც დილის საათებში ახალციხის უბნებიდან საყოფაცხოვრებო ნარჩენები გააქვთ, სამსახურის დასრულების შემდეგ მებაღიშვილის ქუჩაზე დგება. დღის განმავლობაში კი, ახლომდებარე ქუჩების მცხოვრებლები ნარჩენებით სავსე ცელოფნებს ამ მანქანებზე ყრიან. თუ ვინმემ ნაგავი მანქანაზე ვერ შეაგდო, ცელოფნები იქვე, მანქანების გვერდით იყრება. საყოფაცხოვრო ნარჩენების გარდა მებაღიშვილის ქუჩაზე სამედიცინო ნარჩენებიც იყრება.

[მანანა სარაშვილი, ახალციხე]