ახალციხის მერიამ, სამხედრო დასახლების საკუთრებაში გადაცემაზე უარი მიიღო

კულტურის სახლი, უსახლკაროთა თავშესაფარი, მუნიციპალური საავდმყოფო, სკვერი და საბავშვო ბაღი - ეს იმ გეგმების არასრული ჩამონათვალია, რომლების განხორციელებასაც ადგილობრივი ხელისუფლება რუსთაველის N124–ში , ყოფილი სამხედრო დასახლების ტერიტორიაზე აპირებდა. თუმცა, თვითმმართველობას ამ ფართით მოსარგებლემ გადაცემაზე უარი განუცხადა.

„ქალაქ ახალციხეში, რუსთაველის ქუჩა N24–ში მდებარე უძრავი ქონება, შს სამინისტროს სსდ საქართველოს სასაზღვრო პოლიციისთვის წარმოადგენს სამსახურებრივად საჭირო ობიექტს და მისი მუნიციპალიტეტის საკუთრებაში გადაცემა არ მიგვაჩნია მიზანშეწონილად“, – ნათვამია შინაგან საქმეთა სამინისტროდან 12 ივნისს მიღებულ წერილში.

აღნიშნული ტერიტორია ეკონომიკის სამინისტროს ბალანსზეა, რომელიც დროებით სარგებლობაში შინაგან საქმეთა სამინისტროს აქვს გადაცემული, თუმცა რა ვადით და პირობით უცნობია. „სამხრეთის კარიბჭეს“ მიერ გაგზავნილი კითხვებიდან უწყებამ პასუხი მხოლოდ ერთზე გაგვცა, რომ ეს ტერიტორია სჭირდებათ.

„ჯერ კიდევ 2012 წელს ეს ადგილი თავდაცვის სამინსიტროს ეკუთვნოდა. საკადასტრო ნახაზები გავაკეთეთ და შენობები დავიტანეთ, რისი გაკეთებაც გვინდოდა. თუმცა თანხმობა ტერიტორიის გადმოცემაზე ვერც მაშინ მივიღეთ“, – ამბობს ახალციხის მუნიციპალიტეტის ყოფილი თავმჯდომარე მალხაზ გიქოშვილი.

მის შემდეგ ტერიტორიის გადაცემას ითხოვდა ახალციხის პირველი მერი გიორგი კოპაძე და ასევე ამჟამად მოქმედი მერი ვლადიმერ ზედგინიძე.

ახალციხეში, ყოფილ სამხედრო დასახლებას 20 ჰექტრამდე ტერიტორია უკავია. დაახლოებით ოთხ ჰექტარზე სამი ოთხსართულიანი კორპუსი დგას, რას გეგმავს აღნიშნულ ტერიტორიაზე შსს ამ ეტაპზე უცნობია.



[sknews.ge]