„რუსთავი 2“-ის აქციას სამცხე–ჯავახეთიდანაც უერთდებიან

აქციის მონაწილეები სამცხე–ჯავახეთიდან დილიდან გაემგზავრნენ.

როგორც პარტია „ევროპული საქართველოს“ წარმომადგენელი გელა დემეტრაძე „სამხრეთის კარიბჭესთან“ აცხადებს, აქციაზე რეგიონიდან მათი 400–მდე მხარდამჭერი გაემგზავრა.

„ჩვენ ვუერთდებით „რუსთავი 2“–ის პროტესტს, ამიტომ რეგიონიდან მხარდამჭერები უკვე წავედით თბილისში“, – ამბობს გელა დემეტრაძე.

„რუსთავი 2“–ს მხარდაჭერას, სამცხე–ჯავახეთიდან „ნაციონალური მოძრაობაც“ უცხადებს თუმცა, აქციაზე ჯერ მხოლოდ ახალციხიდან, 100–მდე მხარდამჭერი გაემგზავრა.

რაც შეეხება პარტიის ასპინძის, ბორჯომისა და ადიგენის მხარდამჭერებს, ისინი ამბობენ, რომ „რუსთავი 2“–ის აქციას მომდევნო დღეებში შეუერთდებიან.

„ჩვენ დღეს არ წავსულვართ, რა თქმა უნდა ვუერთდებით აქციას და მონაწილეობასაც შემდეგ დღეებში მივიღებთ, როგორც ვიცი, ეს პროტესტი პერმანენტულ სახეს მიიღებს“, – გვითხრა ადიგენის საკრებულოს ფრაქცია „ნაციონალური მოძრაობის“ თავმჯდომარემ რატი ტატალაშვილმა.

ტელეკომპანია „რუსთავი2“–ის მხარდამჭერი საპროტესტო აქცია დღეს, 19 თებერვალს, რუსთაველის გამზირზე 14:30 საათზე დაიწყება. აქციას სამოქალაქო სექტორის, საპარლამენტო და არასაპარლამენტო ოპოზიციის ნაწილი შეუერთდება.

აქციის ორგანიზატორების განცხადებით, ხელისუფლების ზეწოლით უზენაესი სასამართლო აპირებს ტელეკომპანია ”რუსთავი 2” - ის საწინააღმდეგო გადაწყვეტილება გამოიტანოს. პროტესტის ნიშნად, 18 თებერვლიდან ”რუსთავი 2” საპროტესტო მაუწყებლობაზე გადავიდა. ასევე გათიშულია ტელეკომპანია ”მარაო”, “COMEDY არხისა” და ”რუსთავი 2”-ის ვებგვერდები.

[ლუბა გიორგაძე, ახალციხე]