გიორგი კოპაძე: პრემიერმა მოგვიწოდა მუშაობა გავაძლიეროთ

11 მარტს საქართველოს პრემიერ–მინისტრი ირაკლი ღარიბაშვილი ქალაქის მერებსა და მუნიციპალიტეტების გამგებლებს შეხვდა. შეხვედრაზე პრემიერმა სამცხე–ჯავახეთი ერთ–ერთ მოწინავე რეგიონად დაასახელა, სადაც 2014 წელს ცენტრალური ბიუჯეტიდან გამოყოფილი თანხები ეფექტურად აითვისეს.

„შეხვედრა იყო ძალიან კონსტრუქციული, პრემიერმა მოგვახსენა გასული წლის შედეგები ვინ რა გააკეთა. ახალციხის მუნიციპალიტეტის მერია შეგვაქო, რადგან ის თანხა, რაც გვქონდა, დავხარჯეთ ეფექტურად“, – ამბობს ქალაქის მერი გიორგი კოპაძე და ამატებს, რომ დახურულ შეხვედრაზე ბევრ ისეთ საკითხზე იმსჯელეს, რაზეც პრესასთან არ უსაუბრიათ. თუმცა, მთავარი მესიჯი, რაც აღნიშნული შეხვედრაზე მიიღეს, არის ის, რომ მუნიციპალიტეტებმა მუშაობა გააძლიერონ.

გიორგი კოპაძის თქმით, შეხვედრაზე ისაუბრეს მედიის მუშაობაზეც. პრემიერი ფიქრობს, რომ არ ხდება პროცესების ზუსტი აღწერა. ეს შენიშვნა ძირითადად ცენტრალურ მედიასაშუალებებს ეხებათ, თუმცა, პრემიერის აზრს თავადაც ეთანხმება და ფიქრობს, რომ ადგილობრივი მედია იმ კონტექსტში არ აშუქებს ამბებს, როგორც საჭიროა.

„არ ხდება პროცესების ზუსტი აღწერა, მაგრამ ჩვენთვის მთავარია საქმე გაკეთდეს და მოსახლეობამ იგრძნოს ამ პროცესების შედეგები. მე მინდა, რომ ის რაც კეთდება ხალხისათვის, კარგად იყოს გაშუქებული“, – ამბობს გიორგი კოპაძე.

კითხვაზე, რას ნიშნავს კარგად გაშუქება, კოპაძე გვპასუხობს: „ადამიანებმა აქედან უნდა მიიღონ დადებითი ემოციები“.

მისივე თქმით, ირაკლი ღარიბაშვილმა ადგილობრივი თვითმმართველობების პირველ პირებს მოუწოდა, რომ იყვნენ თავისუფლები გადაწყვეტილების მიღების პროცესში და არ დაელოდონ ხელოვნურად შექმნილი ბარიერების გადალახვას. მაგალითად, სამხარაულის ექსპერტიზის დასკვნებს, რაც ხელოვნურად ჭიანურდება.

„ასევე, მუნიციპალიტეტებმა შევიტანეთ წინადადებები შესყიდვებთან დაკავშირებით, რომ გამარტივდეს წესები. პრემიერმა შესაბამის ორგანოებს დაავალა მოამზადონ კანონში ცვლილებები“, – ამბობს გიორგი კოპაძე.

გუშინდელ შეხვედრაზე ცნობილი გახდა, რომ ირაკლი ღარიბაშვბილი მომავალი კვირიდან რეგიონის განვითარების პროგრამის პრეზენტაციას იწყებს. პრემიერი პირველად სამცხე-ჯავახეთის რეგიონს უნდა ესტუმროს. თუმცა, ქალაქის მერის განმარტებით, ამ ეტაპზე უცნობია კონკრეტული თარიღი, როდის ეწვევა ღარიბაშვილი რეგიონს.

[თამარ თოთაძე, ახალციხე]