სამცხე–ჯავახეთში ფერმერებს ნიადაგის გამოკვლევას სთავაზობენ

სოფლის მეურნეობის სამინისტროს სამცხე–ჯავახეთის რეგიონული სამმართველოს თანამშრომლებმა USAD-ის დახმარებით ლაბორატორიული სინჯების გაკეთება დაიწყეს.

„USAD –ის წარმომადგენლებმა ტრენინგი ჩაგვიტარეს და შემოგვთავაზეს მარტივი და ზუსტი დიაგნოზის დასმის მეთოდი. ჩვენ გავდივართ ნაკვეთში, ფერმერებს ვასწავლით წესებს როგორ აიღონ ნიადაგის ნიმუში, ნიადაგი მოგვაქვს ლაბორატორიაში, ჰაერმშრალ მდგომარეობაში ვამუშავებთ, ვასუფთავებთ მცენარის ფესვებისგან, კენჭებისგან და სხვადასხვა მინარევებისგან“, – გვიხსნის სოფლის მეურნეობის სამინისტროს სამცხე–ჯავახეთის რეგიონული სამმართველოს მთავარი სპეციალისტი ლიანა თედორაძე.

გამოშრობის შემდეგ ნიადაგი ნაწილდება და სამმართველოს თანამშრომლები თითოეული ნაწილიდან ნიმუშს იღებენ, რომელიც კიდევ მუშავდება და ერთ წილ ნიადაგზე ხუთ წილი გამოხდილი წყალი ისხმება.

„ამით ვაკეთებთ ნიადაგის წყალხსნარს, რომლის შედეგადაც უკვე ვიწყებთ კვლევას აზოტს, ფოსფორსა და კალიუმზე. ეს არის ძირითადი სამი ელემენტი, რომელიც მცენარეს აუცილებლად სჭირდება მისი ნორმალური ზრდა განვითარებისთვის. რა თქმა უნდა იქ არის მიკრო და მაკრო ელემენტებიც, მაგრამ ეს ლაბორატორია ამის განსაზღვრის საშუალებას არ გვაძლევს“, – ამბობს ლიანა თედორაძე.

მისივე თქმით, ლაბორატორიული გამოკვლევა უფასოა. კვლევის შემდეგ ფერმერებს დაუკავშირდებიან და გარკვეულ რეკომენდაციებს მისცემენ.

„ამით ჩვენ გვინდა ფერმერებში დავნერგოთ კულტურა, რომ შემდგომში ნიადაგის ანალიზი გაკეთდეს. აქამდე უსაზღვროდ შექონდათ მინერალური და ორგანული სასუქები, ორგანული არ ვნებს არაფერს, მაგრამ ზედმეტი მინერალური სასუქები, შხამქიმიკატები უარყოფითად მოქმედებს, როგორც მცენარეზე, ასევე ადამიანზეც. ნიადაგის ლაბორატორიული კვლევის შედეგად ფერმერმა უნდა შეიტანოს ის სასუქი, რაც სჭირდება იმ კონკრეტულ ნიადაგს, – ამბობს იგი და ამატებს, რომ ამით ფერმერები თანხასაც დაზოგავენ, აღარ გამოიყენებენ ზედმეტ აზოტს, ფოსფორსა თუ კალიუმს და იმ რაოდენობას იყიდიან, რაც ნიადაგს სჭირდება, – გარდა ამისა, მნიშვნელოვანია წინა წელს რითი იყო განოყიერებული ნიადაგი, რა კულტურა იყო დათესილი და წელს რის დათესვას გეგმავენ“.

[თამარ თოთაძე, ახალციხე]