სად შეუძლიათ ფერმერებს მიწის ანალიზის უფასოდ ჩატარება

იმისათვის რომ ფერმერმა უკეთესი მოსავალი მიიღოს, მიწის ლაბორატორიული ანალიზის გაკეთებაა აუცილებელი. ანალიზის ჩატარება შემოდგომასა და ადრე გაზაფხულზეა სასურველი.

დაინტერესებულმა ფერმერმა ანალიზის ჩასატარებლად სოფლის მეურნეობის სამინისტროს სამცხე–ჯავახეთის რეგიონული სამმართველოს უნდა მიმართოს. გარდა აღნიშნულისა, ანალიზის ჩატარებაა შესაძლებელი ნინოწმინდის, ახალქალაქის, ახალციხის, ასპინძის,ადიგენისა და ბორჯომის სასოფლო საკონსულტაციო სამსახურებში.

„ფერმერმა ნაკვეთში 5–6 ადგილზე უნდა აიღოს მიწა 0. 30 სმ სიღრმიდან და ჩვენთან უნდა მოიტანოს. ანალიზის პასუხი 3 სამუშაო დღეში იქნება“, – ამბობს სოფლის მეურნეობის სამინისტროს სამცხე–ჯავახეთის რეგიონული სამმართველოს მთავარი სპეციალისტი, აგროქიმიკოსი ლიანა თედორაძე.

მისი თქმით, ფერმერებს საშუალება ექნებათ გაიგონ თავიანთი ნაკვეთის ხარისხობრივი მაჩვენებელი: „ნიადაგის მჟავიანობას ვსაზღვრავთ. ასევე მნიშვნელოვანია სამი ელემენტის აზოტის, ფოსფორის, კალიუმის შემცველობის დადგენა. ამის შემდეგ ეცოდინებათ რა ოდენობის სასუქი უნდა შეიტანონ და რომელი ძირითადი საკვები ელემენტი აკლია ნიადაგს. ამით ზედმეტ დანახარჯებსაც აიცილებენ თავიდან“.

ამ დრომდე ლაბორატორიით 70–მდე ფერმერმა ისარგებლა.

„ამ ეტაპზე 3 000 ანალიზისათვის საჭირო რეაქტივები გვაქვს. ლაბორატორია USAID-ის დაფინანსებით ერთი წლის წინ გადმოგვეცა, შეგვპირდნენ, რომ რეაქტივების გამოლევის შემთხვევაში კიდევ მოგვიტანენ“, – ამბობს ლიანა თედორაძე.

მისი თქმით, ფერმერებს აღნიშნული ლაბორატორიის შესახებ მწირი ინფრომაცია აქვთ და ამიტომ მოსახლეობასთან შეხვედრებს აქტიურად მართავენ.

მიწის ლაბორატორიული ანალიზის ჩატარება შპს „მექანიზატორის“ ახალციხის სერვისცენტრთან არსებულ ლაბორატორიაშიცაა შესაძლებელი, თუმცა აქ ფერმერს ერთი ანალიზის ჩატარებისთვის 50 ლარის გადახდა მოუწევს.

[თინათინ ზაზაძე, ახალციხე]