ახალქალაქში ”ქართული ოცნების” აქტივისტები დააჯარიმეს

მხჩიანისა და რაისიანის ფოტოების გაკვრით აქტივისტებმა პროტესტის გამოხატვა სცადეს. ისინი გეორგ მხჩიანის გათავისუფლებას და მელიქ რაისიანის მისამართით აღძრული სისხლის სამართლის დევნის შეწყვეტას მოითხოვდნენ.

გეორგ მხჩიანი ”ქართული ოცნების” ახალქალაქის შტაბის მეპატრონეა, რომელიც ამჟამად დოკუმენტების გაყალბების ბრალდებითაა დაკავებული. მელიქ რაისიანზე კი სისხლის სამართლის დევნაა დაწყებული. იგი იმავე საქმეში ფიგურირებს, რის გამოც მხჩიანია დაკავებული.

”ჩვენ მივაღწიეთ მიზანს, გვინდოდა, რომ ხალხს გაეგო, ხალხმა კინ გაიგო და მხარი დაგვიჭირა. გაანადგურონ, არაუშავს”, - ამბობს ”ქართული ოცნების” წარმომადგენელი #40 ახალქალაქის საოლქო საარჩევნო კომისიაში ბეჟან გუნავა.

სხვადასხვა კერძო და ადმინისტრაციულ შენობებზე პლაკატები მათი მეპატრონეების ნებართვის გარეშე გააკრეს. თუმცა, ეს ფოტოები, წარწერებით, შენობის კედლებზე დიდხანს არ გაჩერებულა.ზოგი შენობიდან ფოტო მთლიანად ჩამოხიეს, ზოგან კი ნაწილობრივ ისევაა შერჩენილი.
ახალქალაქის მუნიციპალიტეტის გამგეობაში აცხადებენ, რომ პლაკატების გაკვრით აქტივისტებმა ადმინისტრაციული კოდექსი დაარღვიეს. ამ მიზეზით აგვისტოს ბოლოს გამგეობამ რაიონულ სასამართლოში საჩივარიც შეიტანა.

29 აგვისტოს რაიონულმა სასამართლომ გამგეობის საჩივარი განიხილა. სასამართლომ მიიღო გადაწყვეტილება, რომლის თანახმად, ფოტოების უნებართვოდ გაკვრაზე, ადმინისტრაციულ სამართალდარღვევათა კოდექსის 150-ე მუხლის თანახმად, 500-ლარიანი ჯარიმა დაწესდა.

[sknews.ge]