გეორგ მხჩიანის სასამართლო პროცესი ისევ გადაიდო

“ქართული ოცნების” ახალქალაქის შტაბის საინიციატივო ჯგუფის ხელმძღვანელი გეორგ მხჩიანი საქართველოს ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ მიმდინარე წლის 23 ივნისს, 23:00 საათზე დააკავა.

მას ბრალი ედება სისხლის სამართლის კოდექსის 210-ე მუხლის მეორე ნაწილის ა პუნქტით, რაც უფლების დამდგენი დოკუმენტის გაყალბებას გულისხმობს.

წაყენებული ბრალის თანახმად, 1996 წლის 25 ოქტომბერს, არტაშეს ჩახმახჩიანმა კარლოს რაისიანის თხოვნით, ახალქალაქში თამარ მეფის ქუჩა #25ში მდებარე შენობა აუქციონის წესით შეიძინა. 2005 წლის 25 აგვისტოს კარლოს რაისიანის შვილის მელიქ რაისიანის მოთხოვნით ჩახმახჩიანმა ქონება გეორგი მხჩიანზე გადააფორმა.

- “გვედავებიან, რომ რეალურად, ეს შენობა მაინც მელიქ რაისიანისაა და ნასყიდობის ხელშეკურლება თვალთმაქცური გარიგებაა, ფაქტობრივად, ნასყიდობას ადგილი არ ჰქონიაო. ამბობენ, რომ ამ ქმედების გამო მოხდა დანაშაული და მხჩიანმა გააყალბა საკუთრების უფლების დამდგენი დოკუმენტი”, - აცხადებს გეორგ მხჩიანის ადვოკატი გიორგი ჯვარიძე.

26 ივლისს ახალციხის რაიონულმა სასამართლომ მხჩიანი ბრალდებულად ცნო და აღკვეთის ღონისძიების სახით პატიმრობა შეუფარდა.

მხჩიანის საქმეზე წინა სასამართლო სხდომა 2012 წლის 16 აგვისტოსთვის იყო ჩაინიშნული, თუმცა, 5 დღით გადმოიწია. დღეს დანიშნული სასამართლო სხდომა ისევ გადაიდო და 27 აგვისტოსთვის დაინიშნა. გადადების მიზეზი განსასჯელის ადვოკატის გიორგი ჯვარიძის პროცეზე გამოუცხადებლობა გახდა. როგორც მოსამართლე გია ბერაიამ განაცხადა, მიზეზი საპატიო იყო, რადგან ადვოკატს მამა გარდაეცვალა.

- ”პოლიტიკური ნიშნითაა დაკავებული. როგორც კი მან ოფისი მოგვაქირავა, ახალქალაქის პოლიცია დაემუქრა დაგაპატიმრებთო და დააპატიმრეს კიდეც. ამიტომ, ობიექტური გამოძიების იმედი არ მაქვს”, - განაცხადა გიორგი ჯვარიძემ.

[sknews.ge]