გეორგ მხჩიანის სასამართლო პროცესი გრძელდება

სხდომაზე ის მტკიცებულებები გამოიკვლიეს, რომლებიც დაცვის მხარემ სადაოდ ცნო.

დაიკითხნენ ის ადამიანები, რომლებიც წლების განმავლობაში, ახალქალაქში, თამარ მეფის #25-ში მდებარე, სადაო შენობაში მუშაობდნენ.

დაკითხული ხუთი მოწმიდან ბრალდებული მხჩიანი არცერთს უხსენებია. არცერთ მათგანს მხჩიანის მისამართით რაიმე პრეტენზია არ ჰქონია. ყველა მოწმე განაწყენებული იყო იმის გამო, რომ როდესაც თამარ მეფის ქუჩაზე მდებარე შენობა გაიყიდა, მისი შესყიდვის უფლება სწორედ მათ უნდა ჰქონოდათ და არა სხვას, თუნდაც არტაშეს ჩახმახჩიანს. ასე იმიტომ მიიჩნევენ, რომ აქ თითოეული მათგანი ათეული წლების განმავლობაში მუშაობდა. ზოგიერთი მათგანი დალაქი იყო, ზოგი მეწაღე და ზოგიც ტელევიზორის შემკეთებელი.

- ”ფაქტობრივად, მოწმეები გამოდიან ბრალდების მხარეები. ანუ ისინი ადასტურებენ მხოლოდ ერთს, რომ არტაშეს ჩახმახჩიანი არ იყო რეალური მყიდველი, რომ შენობა რეალურად რაისიანების იყო. იმას, რომ შენობა შემდეგ გეორგ მხჩიანზე გადაფორმდა, არცერთი მოწმე არ ამბობს”, - ამბობს მხჩიანის ადვოკატი გიორგი ჯვარიძე.

”ქართული ოცნების” წევრი ბეჟან გუნავა, აცხადებს, რომ მტკიცებულებები რეალური არ არის: ”ძალიან უცნაური ბრალდებაა, რადგან თვითონ ბრალდებაში ვერ ვხედავ ვერანაირ დანაშაულს, რა ყალბი დოკუმენტებზეა საუბარი. ჩემთვის აბსოლიტურად გაუგებარია გეორგ მხჩიანი ამ ყველაფერში რა შუაშია და ამას პროკურორიც ვერანაირად ადასტურებს. ამიტომ გაუგებარია ჩემთვის, როგორ აპირებენ ისინი პატიმრობა მიუსაჯონ მხჩიანს”.

ასევე გაუგებარია გუნავასთვის ის, თუ ვინ არის დაზარალებული: ”სახელმწიფო? პიროვნება? დაზარალებული არავინაა და ვის ასამართლებენ ან რატომ გაუგებარია”.

სხდომაზე ერთი მოწმის გამოუცხადებლობის გამო სასამართო გადაიდო.

მომავალ სხდომაზე დაიკითხება ბრალდებული მხჩიანიც, რომელიც აქამდე დუმილის უფლებას იყენებს.

- "მხჩიანის დაკითხვა პროცესზე ახალი გარემოება იქნება, მე ჯერ არ ვიცი ის რას იტყვის”, - ამბობს ჯვარიძე.

სხდომა 11 სექტემბერს გაიმართება.

მხჩიანს ბრალი სისხლის სამართლის კოდექსის 210-ე მუხლის მეორე ნაწილის ა პუნქტით აქვს წაყენებული, რაც უფლების დამდგენი დოკუმენტის გაყალბებას გულისხმობს.

[თამუნა უჩიძე, ახალციხე]