ახალციხის საჯარო სკოლები ინტელექტუალურ თამაშში შეეჯიბრნენ

ინტელექტუალურ თამაშში: „რა, სად, როდის“, ახალციხის მუნიციპალიტეტის 17 საჯარო სკოლა ჩაერთო.
„საკმაოდ რთული კითხვები იყო. მოიცავდა ზოგად და კონკრეტულ განათლებას. ეს იყო იმ ბავშვებისთვის, ვისაც გაკვეთილების მომზადების გარდა აქვს დრო ზოგადი განათლების მისაღებად“, – ამბობს ახალციხის მუნიციპალიტეტის გამგებლის მოადგილე გურამ მელიქიძე.

მისი თქმით, ეს არ იქნება ერთჯერადი აქცია: „ვფიქრობ, რომ გარკვეული პერიოდულობით უნდა მოვაწყოთ ამ ტიპის შეხვედრები“.
ინტელექტუალურ შეჯიბრში პირველი ადგილი ანის საჯარო სკოლის გუნდმა „ელვამ“ მოიპოვა. მეორე ადგილზე გავიდა აწყურის სკოლა. მესამე და მეოთხე ადგილები კი კლდისა და ვალეს საჯარო სკოლებმა გაინაწილეს. გამარჯვებულებს კულტურის სამსახურის თანამშრომლებმა საჩუქრად წიგნები გადასცეს.

„გამარჯვებისთვის აუცილებელია ვისწავლოთ ის გაკვეთილები, რასაც სკოლაში მასწავლებლები გვასწავლიან. გარდა ამისა, უნდა ვიკითხოთ დამატებით სხვა წიგნები, რათა გავიუმჯობესოთ აზროვნების უნარი. შეჯიბრებებში მონაწილეობა აუცილებელია, რათა აზარტული იყო და აზრი მიეცეს სწავლას“, – ამბობს ანის საჯარო სკოლის მეთერთმეტე კლასის მოსწავლე გიორგი დიანოსაშვილი.

[თინათინ ზაზაძე, ახალციხე]