ვაჟა ჩიტაშვილი: ‘მთავარმა პროკურატურამ, არჩილ კბილაშვილის ხელმძღვანელობით, კარგად იმუშავა’

საპარლამენტო უმცირესობის წევრის და ახალციხის მაჟორიტარი დეპუტატის ვაჟა ჩიტაშვილის თქმით, საქართველოს მთავარმა პროკურატურამ, არჩილ კბილაშვილის ხელმძღვანელობით, კარგად იმუშავა: “პროკურატურაში ათიათასობით განცხადებაა შესული, სადაც მოქალაქეები თავიანთი უფლებების აღდგენას ითხოვენ, რაზეც გამოძიება და სასამართლო პროცესებიც მიმდინარეობს“.

ჩიტაშვილის თქმით, დასაფასებელია, რომ ხელისუფლების შეცვლის შემდეგ პროკურატურაში საკადრო ცვლილებები არ დაიწყო: „ხელისუფლების შეცვლის შემდეგ პროკურატურაში საკადრო რეფორმა არ გატარებულა. იქ დღემდე ძველი კადრები მუშაობენ, რომლებიც ნამდვილი პროფესიონალები არიან. ეს ფაქტი დადებითად უნდა შევაფასოთ, მათ შეინარჩუნეს ყველაფერი, რაც ჩვენ გაგვაჩნდა“.

მისივე თქმით, პროკურატურის მხრიდან გადამეტებასაც ჰქონდა ადგილი: „თუ სუფთა ოპოზიციის თვალით შევხედავ, ვიტყვი, რომ მათ მხრიდან გადამეტებასაც ჰქონდა ადგილი, აღკვეთის ღონისძიებებს ვგულისხმობ, სწორი არ არის ყველას დაპატიმრება“.

ჩიტაშვილი გავრცელებულ ინფორმაციას, თითქოსდა არჩილ კბილაშვილსა და ირაკლი ღარიბაშვილს შორის რაიმე დაპირისპირებას ჰქონდა ადგილი, არასწორად მიიჩნევს და ამბობს, რომ მთავარი პროკურორის განცხადების სჯერა: „კბილაშვილსა და ღარიბაშვილს შორის რაიმე უთანხმოებას გამოვრიცხავ. ხელისუფლება მთლიანად შეიცვალა, გვყავს ახალი პრეზიდენტი, მალე ახალ პრემიერ-მინისტრსაც დაამტკიცებენ. ვფიქრობ, რომ მთავარმა პროკურორმა საჭიროდ ჩათვალა, რომ თავს სამოქალაქო სექტორში უფრო კარგად იგრძნობდა, მე მჯერა მისი განცხადების“.

ვაჟა ჩიტაშვილს უჭირს პროგნოზი, ვინ შეიძლება დაიკავოს ეს პოსტი.

შეგახსენებთ დღეს, 7 ნოემბერს, საქართველოს მთავარმა პროკურორმა არჩილ კბილაშვილმა თანამდებობიდან გადადგომის შესახებ განაცხადა. კბილაშვილმა აღნიშნა, რომ მას ჰქონდა ბიძინა ივანიშვილისა და ირაკლი ღარიბაშვილისგან განსხვავებული შეხედულებები სამართალდაცვით სფეროში გასატარებელ რეფორმებთან დაკავშირებით, მაგრამ აღნიშნული ერთ გუნდში მყოფი საერთო მიზნის მქონე თანამებრძოლების განსხვავებული შეხედულებებია, რაც ყოველთვის არსებობდა და მომავალშიც იარსებებს ბიძინა ივანიშვილის რეფორმატორთა გუნდში. „ყველას გაუჩნდება კითხვა რატომ მივდივარ. წინდაწინვე მინდა ვთქვა, რომ არავითარი უთანხმოება ჩემსა და მომავალ პრემიერ-მინისტრ ირაკლი ღარიბაშვილს შორის არ არსებობს“, - განაცახდა არჩილ კბილაშვილმა, რომელიც ბიძინა ივანიშვილის მსგავსად ასევე სამოქალაქ სექტორში აპირებს მუშაობის გაგრძელებას.

[მანანა სარაშვილი, ახალციხე]