ვაჟა ჩიტაშვილი: ‘ხელისუფლების ერთ-ერთი მინუსი პრობლემების სხვაზე გადაბრალებაა’

„არ შემეშინდება და ვიტყვი, თქვენ შსს ნამდვილად გააჩოჩეთ პოლიტიკისგან“, - ასე მიმართა ახალციხის მაჟორიტარმა დეპუტატმა „ნაციონალური მოძრაობიდან“ ვაჟა ჩიტაშვილმა საქართველოს პრემიერ მინისტრს, ირაკლი ღარიბაშვილს.

ჩიტაშვილი გვიხსნის, რომ იგი გაჩოჩებაში სულ განდევნას არ გულისხმობს: „ეს იმას ნიშნავს, რომ გვერდზე გაწიო“.

დეპუტატს აღნიშნულის განცხადების საფუძველი საარჩევნო პერიოდში პოლიციელებზე საკუთარმა დაკვირვებამ მისცა: „ვაკვირდებოდი პოლიციის საქმიანობას, მაინტერესებდა საარჩევნო პროცესებში ჩაერეოდა თუ არა და ასეთი რამ ნამდვილად არ შემინიშნავს“.

კითხვაზე, მისი განცხადების საფუძველზე იგულისხმება თუ არა, რომ „ნაციონალური მოძრაობის“ დროს პოლიცია პოლიტიზებული იყო, გვპასუხობს: „არა, რა თქმა უნდა, ასეთს არაფერს ვგულისხმობ, მანამდე რა როგორ იყო სხვა თემაა“.

ჩიტაშვილი აცხადებს, რომ შსს გარკვეულწილად პოლიტიზებული ჯერ კიდევაა, თუმცა მიიჩნევს, რომ ეს სტრუქტურა აბსოლუტურად აპოლიტიკური უნდა იყოს.

„პოლიციელები რომ ქრთამს არ იღებენ და კრიმინალებთან არ არიან გათქვეფილნი, ასევე ის, რომ თანამედროვე ტექნიკით არიან აღჭურვილნი, ეს გუშინ და დღეს კი არა, გაცილებით ადრე მოხდა. ამიტომ ვუთხარი ღარიბაშვილს, რომ კარგი იქნებოდა ეთქვა, იქ რა დახვდა, როცა მივიდა და ჩვენი მხრიდან ვიტყოდით, რომ თქვენ გვერდზე გააჩოჩეთ პოლიტიკა შინაგან საქმეთა სამინისტროსგან“, - ამბობს ჩიტაშვილი.

მას ახალი ხელისუფლების ერთ-ერთ მინუსად, პრობლემების არსებობის არაღიარება და სხვაზე გადაბრალებაა მიაჩნია: „დედა რომ თავისი შვილის წარუმატებლობას მასწავლებელს აბრალებს, ეს ძალიან ცუდია, შვილი სერიოზულ პრობლემებს წააწყდება, როცა გაიზრდება“.

მისი თქმთ, ახალი ხელისუფლება ეკონომიკურ წარუმატებლობას პრეზიდენტის რიტორიკას აბრალებს: „ეს ძალიან ცუდია. შეიძლება არსებობდეს პრობლემა ეკონომიკაში ბიუჯეტთან დაკავშირებით და მისი კორექტირება გააკეთო, მაგრამ სხვას ეს ნამდვილად არ უნდა დააბრალო“.

ჩიტაშვილს უჭირს პროგნოზი, როგორ გაართმევენ თავს დაკისრებულ მოვალეობებს ახალგაზრდა მინისტრები: „ასაკი გადამწყვეტი ნამდვილად არ არის. წინასწარ ვერ გავაკეთებ დასკვნებს, რომ ჭიკაიძე და ღარიბაშვილი ქვეყანას დაღუპავენ, ან ააშენებენ, დაველოდოთ მოვლენების განვითარებას. ერთ წელიწადში გამოჩნდება, მოიმატებს თუ არა ქვეყანაში კრიმინალი“.

[თამუნა უჩიძე, ახალციხე]