სამცხე–ჯავახეთი ველოტურს უმასპინძლებს

6 მარტს ველომრბოლელები წალკა - ნინოწმინდა - ახალქალაქის 95 კმ–იან მონაკვეთს გაივლიან, 7 მარტს ახალქალაქი - ასპინძა - ახალციხის 80 კმ–ს, 8 მარტს ახალციხე - ვალე - ადიგენი - ზარზმის 55 კმ–იან მონაკვეთს. რეგიონს მეოთხე დღეს, 9 მარტს დატოვებენ. ამ დღეს ველომრბოლელები ზარზმიდან ხულო–შუახევის გავლით აჭარაში გადავლენ.

მსოფლიო ველომოგზაურის - ჯუმბერ ლეჟავას სახელობის ველოტური "საქართველო მშვიდობისათვის" 25 თებერვლიდან იწყება და 25 მარტამდე გრძელდება. ეს ველოტურის მესამე ეტაპია. ტური საქართველოს 50-ზე მეტ ქალაქსა და რაიონს და ჯამში 2200 კილომეტრს მოიცავს.
ველოტურის ორგანიზატორია საერთაშორისო საზოგადოებრივი ორგანიზაცია "ყველა ერთისათვის" თავმჯდომარე ნოდარ ბერიძე.

მასშტაბური ველომართონები 2014 წლიდან დაიგეგმა. პირველი ველოტური "ყველა მშვიდობისათვის" 24 აგვისტოდან 10 ნოემბერის ჩათვლით უკრაიანში განხორციელდა, მოიცვა 5000 კმ-ზე მეტი და 22 საოლქო ქალაქი, თუმცა ჯუმბერ ლეჟავას გარდაცვალების გამო, ღონისძიებაში მონაწილეობა მხოლოდ ნოდარ ბერიძემ მიიღო. მომავალი ტურების ორგანიზება კი სწორედ ლეგენდარული ქართველი სპორტსმენისა და ველომოგზაურის ხსოვნის საპატივცემულოდ გადაწყდა.

ჯუმბერ ლეჟავას სახელობის მე-2 ველოტური „საქართველო მშვიდობისათვის" (თბილისი - სამაჩაბლოს და აფხაზეთის საზღვრები) 2014 წლის 20-25 დეკემბერს განახორციელდა.

№3 ტურის შემდეგ დაანონსდება შემდგომი ველოტური №4 „კავკასია მშვიდობისათვის" (თბილისი-ბაქო-ერევანი-თბილისი, 2-30 აპრილი) და ყველაზე მთავარი - ველოტური №5 „საქართველო მშვიდობისათვის" (ა/წ 1-5 მაისს, თბილისი-სამაჩაბლოსა და აფხაზეთის საზღვრები) ქართველი, ოსი, აფხაზი, რუსი, უკრაინელი, სომეხი, აზერბაიჯანელი და სხვა ეროვნების ველომრბოლელების მონაწილეობით, ფართომასშტაბიანი შეხვედრებით სამაჩაბლოსა და აფხაზეთის საზღვრისპირა, ასევე მარშრუტის ქალაქების მცხოვრებლებთან.

ველოტურების მისია და მიზანია:

მსოფლიოში ყველა პრობლემის ომის გარეშე მოგვარების მოწოდება;
ადამიანთა შორის კავშირების აღდგენა;
ჯანსაღი ცხოვრებისა და სპორტის პოპულარიზაცია;
ფართო საზოგადოებისასთვის ჯუმბერ ლეჟავას ბიოგრაფიის და მიღწევების გაცნობა

[ნინო ნარიმანიშვილი, ახალციხე]