ზედმეტი სულები წყლის ქვითრებში

გასული წლიდან მოყოლებული, ახალქალაქის მოსახლეობას სასმელი წყლის გადასახადზე პრობლემები აქვს. აბონენტები
წყლის საფასურს სულადობის მიხედვით, სულზე 25 თეთრს იხდიან.

საქართველოს გაერთიანებული წყალმომარაგების კომპანიას სულადობის რაოდენობა სამოქალაქო რეესტრმა მიაწოდა. თუმცა, როგორც მოგვიანებით აღმოჩნდა, ქვითრებში ოჯახის წევრთა რაოდენობა გაცილებით მეტია, ვიდრე კონკრეტულ სახლებში რეალურად ცხოვრობენ. ამის გამო, ბევრმა საჩივრით წყალმომარაგების კომპანიას მიმართა, თუმცა მათ სამოქალაქო რეესტრში გადაამისამართეს.

კარინე იშხანიანმა მიიღო ქვითარი, რომლის მიხედვით მის ბინაში ერთი უცნობი ქალბატონია რეგისტრირებული.

- ’’აღმოჩნდა, რომ ჩვენს სახლში ჩაწერილია ვინმე წაღიქ უზბაშიანი, რომლის შესახებ არც კი გვსმენია. ვეძებთ, მაგრამ ვერ ვპოულობთ’’, - ამბობს იგი.

აღნიშნული პრობლემების გამო საქართველოს გაერთიანებული წყალმომარაგების კომპანიამ გადაწყვიტა ქვითრები სხვაგვარად შეემოწმებინა.

- ’’სისტემამ, რომლითაც ქვითრებს ვბეჭდავდით, არ გაამართლა. აღმოჩნდა, რომ სახლების მეპატრონეებიც და მობინადრეებიც იცვლებოდნენ, მონაცემები კი არ იცვლებოდა, ზოგ სახლში 10 ადამიანია ჩაწერილი, რეალურად კი რამდენიმე ცხოვრობს’’, - ამბობს საქართველოს გაერთიანებული წყალმომარაგების კომპანიის ახალქალაქის ფილიალის დირექტორი არტაკ ტარლამაზიანი.

- ’’ოჯახში ორი სული ვართ, მაგრამ ქვითარი სამზე მოვიდა. აღმოჩნდა, რომ ჩვენს სახლში მეზობლის შვილია ჩაწერილი. ალბათ უბრალოდ შეცდომა გაიპარა’’, - ამბობს ახალქალაქის მკვიდრი ბავაქან მელქონიანი, რომელმაც საკუთარი ქვითარიც უნდა გაასწოროს და ქალიშვილისაც, რომლის ქვითარში ხუთის ნაცვლად 15 წევრია დაფიქსირებული.

რეესტრის მონაცემების შესწორებას ახალქალაქელები რამდენიმე თვეა ცდილობენ. ინფორმაცია მათ ბუკლეტებითაც მიაწოდეს და ტელევიზიითაც. ქვითრების შესასწორებლად აბონენტებმა ოჯახის წევრთა რაოდენობის შესახებ ცნობა უნდა წარადგინონ.

აღრიცხვის მენეჯერი აღუნიკ პალოიანი ამბობს, რომ დღეში უამრავი ადამიანი აკითხავთ, თუმცა, ეეჭვება პირველ მაისამდე ქვითრების შესწორება ყველამ შეძლოს. ვინც ვერ მოასწრებს, ქვითარში ჩაწერილი სულადობის მიხედვით უნდა გადაიხადოს.

წყალმომარაგების კომპანიაში გადასახადების გადახდის მაჩვენებლით უკმაყოფილო არიან.

- ’’მაისის ბოლომდე იურიდიულ სუბიექტებს წყლის მრიცხველი დაუმონტაჟდება. ფიზიკური პირების გამრიცხველიანება ჯერ არ იწყება, მაგრამ თუ მოსახლეობა წყლის საფასურს არ გადაიხდის, იქაც დავაყენებთ მრიცხველებს’’, - აცხადებს არტაკ ტარლამაზიანი.

[ქრისტინა მარაბიანი, ახალქალაქი]