2 გარდაცვლილი, 7 დაშავებული - თბილისი-ვალეს „მარშუტკას“ ავარია შეემთხვა [Video]

შემთხვევა თბილისი - ახალციხის ცენტრალური მაგისტრალის აგარა - გომის მონაკვეთზე მოხდა.

როგორც საქართველოს შინაგან საქმეთა სამინისტროში გვაცნობეს, ავტოსაგზაო შემთხვევის შედეგად ერთ-ერთი მგზავრის ორი მცირეწლოვანი შვილი გარდაიცვალა, გარდაცვლილების დედის ჯანმრთელობის მდგომარეობა დამაკმაყოფილებელია. დაზარალებული მგზავრები კი ამ დროისთვის ქარელის საავადმყოფოში გადაიყვანეს.

მომხდარს საპატრულო პოლიციის დეპარტამენტის შიდა ქართლის მთავარი სამმართველოს საგამოძიებო განყოფილება, სისხლის სამართლის კოდექსის 276-ე მუხლის მე-7 ნაწილით იძიებს. ადგილზე მობილიზებულია საპატრულო პოლიცია. დააკავეს თუ არა მძღოლი, უცნობია. შსს-ში განგვიმარტეს, რომ შემთხვევა ახალი მომხდარია და ჯერ დამატებითი დეტალები არ არის გარკვეული.

დაუდასტურებელი ინფორმაციით, გარდაცვლილი მცირეწლოვანი ბავშვები ახალციხის მცხოვრებლები არიან. „სამხრეთის კარიბჭე“ მომხდარის შესახებ დამატებითი დეტალების გარკვევას ამ წუთებშიც ცდილობს.



[ნინო ნარიმანიშვილი, ახალციხე]