აგარა-გომის მონაკვეთზე ავარიისას გარდაცვლილი დედა-შვილების ვინაობა ცნობილია

ავარიას 30 წლის, რ. ხ. და მისი ორი, 6 და 3 წლის შვილები ემსხვერპლნენ. გარდაცვლილები ახალციხეში, ქალაქის ცენტრალურ ნაწილში ცხოვრობენ.

რ.ხ. წარმოშობით ქარელიდანაა. იგი შვილებთან ერთად ქარელში დედასთან იყო სტუმრად და ახალციხეში, ოჯახში ბრუნდებოდა. თბილისი - ვალეს მიკროავტობუსს იგი ქარელის გადასახვევიდან მოჰყვებოდა.

მისი მეუღლე ა.ჩ. ამ დროისთის საქართველოში არ იმყოფება. როგორც ‘სამხრეთის კარიბჭემ“ გაარკვია, იგი ისრაელში, სამუშაოდაა წასული.

გარდაცვლილები ახალციხეში, სახლში, ჯერ არ ჩამოუსვენებიათ.

შეგახსენებთ, დღეს, 21 თებერვალს, შუადღეს, თბილისი - ვალეს მიმართულებით მოძრავი მიკროავტობუსი გზიდან გადავარდა, ბოძს დაეჯახა და ამოტრიალდა. შედეგად 3 ადამიანი გარდაიცვალა და 7 დაშავდა. 3-დან 2, მცირეწლოვანი ბავშვები, ადგილზე გარდაიცვალნენ, მათი დედა კი აავადმყოფოსკენ მიმავალ გზაზე.. დაშავებული 7 ადამიანიდან, სამი მგზავრი შედარებით მძიმე მდგომარეობით გორის და თბილისის, იაშვილის საავადმყოფოში გადაიყვანეს, დანარჩენების ჯანმრთელობის მდგომარეობა დამაკმაყოფილებელია. ისინი სახლებში გაწერეს.

მომხდარს საპატრულო პოლიციის დეპარტამენტის შიდა ქართლის მთავარი სამმართველოს საგამოძიებო განყოფილება, სისხლის სამართლის კოდექსის 276-ე მუხლის მე-7 ნაწილით იძიებს

[ნინო ნარიმანიშვილი, ახალციხე]