ახალციხის მერი: დაფინანსების შემცირებით რაბათის ადმინისტრაციამ მარკეტინგზე დაიწყო ფიქრი

ახალციხის მერმა რაბათის შესახებ დღეს, 3 თებერვალს, მედიისთვის სპეციალური ბრიფნგი გამართა. კოპაძემ განმარტა, რომ ციხეში შტატების შემცირება ადგილობრივი ბიუჯეტიდან სუბსიდიის შემცირებამ გამოიწვია. გასულ წელთან შედარებით, 2015 წელს, ქალაქ ახალციხის ბიუჯეტიდან ციხის დაფინანსება 250.000 ლარით შემცირდა.

„არც კოლექტივთან და არც იქ მყოფ ადამიანებთან არანაირი პრობლემა არ მაქვს, აქ არის საუბარი კანონთან ურთიერთობაზე. როცა მე გადავიბარე ქალაქის მერია და ააიპ ახალციხის ციხე, მაშინ 104 თანამშრომელი მუშაობდა. 70 ადამიანზე მეტი ხელშეკრულებით იყო აყვანილი, რაც ჩემი აზრით ზედმეტი იყო“, – განაცხადა ქალაქის მერმა.

მისივე თქმით, ციხისთვის ბიუჯეტის შემცირების იდეა ადგილობრივ არასამთავრობო სექტორსა და ოპოზიციას გაუჩნდა.

„ჩვენც დავეთანხმეთ. როცა გადავხედეთ ბიუჯეტს, ონკანის ოთხი მომშვები სულაც არ იყო საჭირო. ის თანხა, რაც ციხეს მოაკლდა, დაიხარჯა ავარიული სახლის რეაბილიტაციაზე, ხიდის რემონტზე, სკვერების მოწესრიგებაზე და ასე შემდეგ. ამაში ცუდს ვერაფერს ვხედავ და დარწმუნებული ვარ, რომ ამ თანხის მოკლებამ გამოაცოცხლა ციხის ადმინისტრაცია“, – ამბობს კოპაძე და ამატებს, რომ ციხეს შეუძლია თავისი შემოსავლებით, სწორი მენეჯმენტითა და ფართების გაქირავებით შემოსავლიანი გახდეს.

ქალაქის მერი ფიქრობს, რომ ციხეს ბევრი სამსახური, რაც ამჟამად ფუნქციონირებს, არ სჭირდება: „მაგალითად საზოგადოებასთან ურთიერთობის სამსახური. ამ სფეროს ჩვეულებრივად გაუძღვება ორი სპეციალისტი“.

კოპაძე ციხის დირექტორის დანიშვნის თემასაც გამოეხმაურა. მან განაცხადა, რომ ციხის დირექტორის მოვალეობის შემსრულებლის მუშაობით კმაყოფილია, თუმცა, ეს არ ნიშნავს იმას, რომ ილია სიდამონიძე ამ თანამდებობაზე დაინიშნება: „მაგალითად იანვარში 100–ით მეტი ვიზიტორი იყო, ვიდრე წინა თვეში. ეს მიგვანიშნებს, რომ მათ დაიწყეს უკვე მენეჯმენტზე ფიქრი“.

რაც შეეხება კითხვას, როგორ ეძებენ ახალ კადრს ციხის დირექტორის პოსტზე, კოპაძემ აღნიშნა: „კანონი არ ითხოვს, რომ ვაკანსია გამოცხადდეს, ეს არის მერის პრეროგატივა, ნებისმიერი ააიპ–ის დირექტორს ქალაქის მერი ნიშნავს და მე ამ პრეროგატივას გამოვიყენებ“.
რაც შეეხება ციხის დათვალიერების გაძვირებას, ქალაქის მერმა განაცხადა, რომ ფასმა მხოლოდ უცხოელი ტურისტებისთვის მოიმატა.

„ის დაპირება, რომ ახალციხელებისთვის ციხის ტერიტორიაზე შესვლა უფასო იქნება, ეს გაკეთდება ალბათ იმის ხარჯზე, რომ ბიუჯეტიდან გამოვყოფთ თანხას, რადგან ციხეს ამის საშუალება არ აქვს“, – განუცხადა კოპაძემ მედიას.

შეგახსენებთ, რომ 2014 წლის დეკემბრიდან ახალციხის ციხემ ხელშეკრულებით აყვანილი თანამშრომლებისა და შტატების შემცირება დაიწყო. ადგილობრივმა ბიუჯეტმა კი ციხეს სუბსიდია შეუმცირა. ციხეში მომხდარ მოვლენებს სისტემატურად აშუქებდა "სამხრეთის კარიბჭე", კვირას კი თემა "პოსტკრიპტუმმა" გააშუქა.

[თამარ თოთაძე, ახალციხე]