უპირისპირდება თუ არა მეორე სკოლის ახალ დირექტორს მშობლების ნაწილი

ახალციხის მუნიციპალიტეტის მეორე საჯარო სკოლას, დაახლოებით სამი კვირაა, რაც ახალი ხელმძღვანელი ჰყავს. სკოლაში სადაც, ორი: ქართული და რუსული სექტორია, ბელა დიასამიძემ მარინა ზედგინიძე ჩაანაცვლა.

მეთერთმეტე კლასის მშობელთა კომიტეტის თავმჯდომარე მარინა გიორგაძე, აცხადებს, რომ ახალი დირექტორი ბავშვებთან კომუნიკაციას ვერ ამყარებს: „მარინა ზედგინიძის გადაყენებამ ძალიან იმოქმედა ჩვენზე. ის ძალიან კარგი ხელმძღვანელი იყო. ახალმა დირექტორმა რუსული ენა არ იცის და ამიტომ ვერ აგებინებს ბავშვებს, რისი თქმა უნდა. ყველაზე მეტად ეროვნებით სომეხ პატარებს უჭირთ. მათ ქართული არ იციან და იმიტომ“.

გიორგაძის განცხადებით, მშობლები ამ საკითხთან დაკავშირებით შეკრებას აპირებენ: „გადავწყვეტთ როგორ მოვიქცეთ და შეიძლება წერილობით განათლებისა და მეცნიერების სამინისტროსაც მივმართოთ“.

გიორგაძე ახალ დირექტორს ჯერ პირადად არ იცნობს. ამბობს, რომ ჯანმრთელობის პრობლემების გამო მას შემდეგ რაც დიასამიძე დანიშნეს, სკოლაში არ ყოფილა და ამბავი იმის შესახებ, რომ ახალ დირექტორს ბავშვებთან კომუნიკაცია უჭირს, მასთან სანახავად მისული მშობლებისგან შეიტყო.

მიუხედავად გიორგაძის განცხადებისა, „სამხრეთის კარიბჭესთან“ დირექტორის მისამართით უკმაყოფილება არცერთ მშობელს არ გამოუთქვამს.
"თუ რუსული ენა არ იცის ახალმა დირექტორმა, ამაში პრობლემას ვერ ვხედავ. ახალი დირექტორის საწინააღმდეგო არაფერი მაქვს", - ამბობს პირველი კლასის მოსწავლის მშობელი აქსანა გოგოლაძე.

მას ეთანხმება ამავე კლასის მოსწავლის ბებია ჯულიეტა ჩახოიანი: :“დირექტორმა აუცილებელი არ არის იცოდეს ძალიან კარგად რუსული. მთავარია, კარგი ხელმძღვენელი იყოს. ენები კარგად უნდა იცოდნენ მასწავლებლებმა, რადგან ბავშვებთან ურთიერთობა მათ აქვთ“.

მშობელი ლარისა ხანიკიანი ამბობს, რომ მანაც და მისმა შვილებმაც ქართული კარგად იციან: „სასურველია დირექტორმა რუსული იცოდეს. ძველი დირექტორი ძალიან კარგი ხელმძღვანელი იყო, მაგრამ შეიძლება ახალი უკეთესი აღმოჩნდეს“.

ბელა დიასამიძე მეორე საჯარო სკოლის დირექტორად განათლებისა და მეცნიერების მინისტრმა 9 იანვარს დანიშნა, როგორც იგი ამბობს მასთან საყვედურით ამ დრომდე არავინ მისულა და არც პროტესტი გამოუხატავთ: „ეს ამბავი ახლა თქვენგან გავიგე“.

კითხვაზე, ფლობს თუ არა რუსულ ენას, გვპასუხობს: „ბავშვები საუბრობენ რუსულად და მე ვპასუხობ ქართულად. არავის უთქვამს, რომ ვერ გაიგეს და პრობლემა შეექმნათ“.

მშობლების უკმაყოფილების შესახებ არაფერი იციან არც სკოლის მასწავლებლებმა.
„მშობლები რომ რაიმეს აპროტესტებდნენ ამის შესახებ ნამდვილად არაფერი გამიგია“, - ამბობს პედაგოგი მარინა გელაშვილი.

ახალდანიშნული დირექტორისა და პედაგოგებისგან განსხვავებით, აღნიშნულის შესახებ ინფორმირებულია სკოლის ყოფილი დირექტორი, თუმცა ამბობს, რომ თავად ამ საკითხში ჩარევა არ სურს, რადგან ეს მისი მხრიდან არასწორია: „მშობლები ამბობენ, რომ ახალი ხელმძღვანელი და მისი მოყვანილი მოადგილე რუსულ ენას ვერ ფლობენ. სკოლა კი დაკომპლექტებულია რუსული და ქართული სექტორით და ამიტომ კომუნიკაცია ვერ ხერხდება. ამასთან დაკავშირებით მშობლები პროტესტს გამოხატავენ და მათ აქვთ საკუთარი აზრის გამოთქმის უფლება“.

შეგახსენებთ, რომ ახალციხის მეორე საჯარო სკოლაში დირექტორის არჩევნები 2014 წლის 2 დეკემბერს ჩატარდა. 8 წევრიდან ბელა დიასამიძეს, რომელიც ერთადერთი დირექტორობის კანდიდატი იყო, მხარი მხოლოდ სამმა დაუჭირა.



[თინათინ ზაზაძე, ახალციხე]