ახალციხის მესამე საჯარო სკოლას ახალი დირექტორი ჰყავს

მესამე საჯარო სკოლის დირექტორი სუსანა აკოფოვა სამსახურეობრივი მოვალეობის შესრულებას უკვე შეუდგა.

მისი თქმით, ყოფილ დირექტორს სვეტა არუთინოვას უფლებამოსილების ვადა, ჯერ კიდევ გასული წლის ნოემბერში ამოეწურა: „ამიტომ სამი თვის განმავლობაში დირექტორის მოვალეობას სასწავლო ნაწილი სუსანა მინასიანი ასრულებდა“.

ამიტომ განათლების სამინისტრომ აღნიშნულ პოზიციაცე კონკურსი გამოაცხადა.

„სერთიფიცირებული დირექტორობის კანდიდატი ჯერ სკოლის სამეურვეო საბჭომ შეარჩია, შემდეგ კი განათლების სამინისტრომ დაამტკიცა“, – აცხადებენ განათლებისა და მეცნიერების სამინისტროში.

აკოფოვას თქმით, დირექტორად დანიშვნამდე მან სამინისტროში გასაუბრება სამჯერ გაიარა: „მესამედ უკვე მინისტრთან ჯეჯელავასთან მქონდა გასაუბრება. შემდეგ კი ჩემი დანიშვნის ბრაძანება მოვიდა“.

იგი მესამე საჯარო სკოლაში 38 წელია რუსულ ენას ასწავლის. უმაღლესი განათლება 1974–1978 წლებში სომხეთში, ქალაქ გიუმრის მიქაელ ნალბანდიანის სახელობის უნივერსიტეტში მიიღო. მან აქ ფილოლოგიის ფაკულტეტი დაამთავრა.

ახალდდანიშნული დირექტორი აცხადებს, რომ სკოლაში მთავარი პრობლემა გათბობაა: „შეშით ვთბებით, ამიტომ ყოველ ზამთარს სირთულეების იქმნება. ახლა იყვნენ სამინისტროდან ჩამოსულები, პროექტი მოამზადეს და დაგვპირდნენ, რომ მიმდინარე წელს ამ საკითხს აუცილებლად მოაგვარებენ და ბუნებრივ აირზე გადავალთ“.

გარდა ამისა, ახალი დირექტორს სურს, რომ მისი სკოლის პედაგოგები საგნობრივ გამოცდებში გადაემზადონ: „ეს სკოლის პრესტიჟს აგვიმაღლებს. 60 პედაგოგი მყავს, აქედან მხოლოდ სამია უფროსი მასწავლებლის სტატუსით. დანარჩენები პრაქტიკოსი პედაგოგები არიან“.
აკოფოვა, სკოლაში საკადრო ცვლილებებს არ გეგმავს: „ყველაფერს ისე დავტოვებ ჯერჯერობით როგორც დამხვდა“.

შეგახსენებთ, რომ ახალციხის მესამე საჯარო სკოლის დირექტორის თანამდებობას 2010 წლიდან, 2016 წლამდე სვეტა არუთინოვა იკავებდა, რომელიც ამავე სკოლაში ფიზიკის საგნის პედაგოგია.

[ლუბა გიორგაძე, ახალციხე]