ახალციხის ციხიდან ექვსი თანამშრომელი გაათავისუფლეს

ახალციხის ციხეზე რეორგანიზაცია 2018 წლის დეკემბერში დაიწყო და დღეს, ხუთ აპრილს დასრულდა. ააიპ–ში ჯამში ხუთი სამსახური დარჩა, სადაც 74 თანამშრომელია დასაქმებული. ესენია: ადმინისტრაციის სამსახური, ტურიზმისა და საზოგადოებასთან ურთიერთობის სამსახური,მატერიალურ–ტექნიკური უზრუნველყოფის სამსახური, საფინანსო სამსახური და უსაფრთხოების სამსახური.

გაერთიანდა ტურიზმისა და საზოგადოებასთან ურთიერთობის სამსახური, მის უფროსად გვანცა გოგოლაძე დაინიშნა, რომელიც მანამდე ტურიზმის სამსახურის უფროსი იყო.

გაერთიანდა, ასევე, სამეურნეო სამსახური და წყალმომარაგება–გამწვანებისა და დასუფთავების სამსახური და შეიქმნა მატერიალურ–ტექნიკური უზრუნველყოფის სამსახური. მის უფროსად ილია სიდამონიძე დაინიშნა, მას აქამდე წყალმომარაგება–გამწვანებისა და დასუფთავების სამსახურის უფროსის პოზიცია ეკავა.

რეორგანიზაციის შედეგად გაუქმდა იურისტისა და საქმეთა მწარმოებლის შტატები და შეიქმნა ადმინისტრაციული სამსახური, რომლის უფროსად ჯუნა კიპაროიძე დაინიშნა. კიპაროიძე მანამდე საზოგადოებასთან ურთოერთობის სამსახურის უფროსი იყო.

უსაფრთხოების სამსახურის უფროსად დარჩა პეტრე ინასარიძე,საფინანსო სამსახურის უფროსად კი ია ხუციშვილი.

ახალცხის ციხის დირექტორის დავით ტაბატაძის განმარტებით, ჯამში რვა შტატი გაუქმდა, სამსახურის გარეშე კი შვიდი თანამშრომელი დარჩა.
„იურისტის შტატი გაუქმდა, მაგრამ ამ პოზიციაზე ვინც მუშაობდა რამდნეიმე თვის წინ სხვა სამსახურში გადავიდა, ამიტომ მისი სამსახურიდან გაშვება არ მოგვიწია.რეორგანიზაცია შეეხო რიგით სპეციალისტებსაც, გამწვანების სამსახურში ორი შტატი შემცირდა, წყალმომარაგებაში ერთი, ერთით შემცირდა გათბობა–გაგრილებისა და სანტექნიკის სპეციალისტის რაოდენობაც“.

რეორგანიზაციის დასრულების შემდეგ გაიზარდა თანამშრომლების ხელფასებიც.

სამსახურის უფროსების ხელფასები დარიცხვით 1000 ლარი გახდა, მთავარი სპეციალისტების 800 ლარი, უფროსი სპეციალისტების 650 ლარი, სპეციალისტების 550 ლარი, დასუფთავების სამსახურის თანამშრომლების ხელფასი 400 ლარით განისაზღვრა, იგივე 500 ლარი დარჩა გიდების ხელფასი, თუმცა მათი მომსახურებიდან შემოსული თანხის 10% ყოველთვიურად დაერიცხებათ.

ახალციხის ციხეზე ხელშეკრულებით თანამშრომლებს მაისიდან–ოქტომბრამდე აიყვანენ. დავით ტაბატაძე ამბობს, რომ წელს ხელშეკრულებით დაახლოებით 10 თანმაშრომელს აიყვანენ.

[თინათინ ზაზაძე, ახალციხე]