ახალციხის ციხიდან გათავისუფლებულ თანამშრომლებს ექვსი თვით დააბრუნებენ

ააიპ ახალციხის ციხეში განმარტავენ, რომ შვიდი თანამშრომლიდან სამსახურში დაბრუნება ექვს მათგანს შეუძლია, რადგან ერთის შტატი უკვე გაუქმდა.

„ოთხთან ხელშეკრულება დღეს, 17 მაისს ოქტომბრის ბოლომდე გავაფორმეთ, ორს კი ორშაბათს, 20 მაისს ველოდებით ახალციხის ციხეში. რა პოზიციაზეც მანამდე იყვნენ იმ პოზიციაზე აღვადგინეთ“,–გვითხრა ახალციხის ციხის დირექტორის მოადგილემ ნათია ხუციშვილმა.

ორშაბათს, 20 მაისს გაირკვევა დაბრუნდებიან თუ არა ახალციხის ციხეზე ექვსი თვით სამუშაოდ გამწვანების და გათბობა–გაგრილების სპეციალისტები რეზო გიქოშვილი და ვეფხვია სამსონიძე.

„თუ იგივე თანამდებობაზე დამაბრუნებენ ხელშეკრულებას ხელს მოვაწერ, წინასწარ ვერაფერს ვიტყვი“, – განმარტავს „სამხრეთის კარიბჭესთან ვეფხვია სამსონიძე.

მიმდინარე წლის ხუთ აპრილს რეორგანიზაციის შედეგად, სამსახურიდან გათავისუფლებული თანამშრომლებიდან სამსონიძე ერთ–ერთია, რომელმაც ახალციხის ციხის წინააღმდეგ სასამართლოში საჩივარი შეიტანა. მასთან ერთად სამსახურში აღდგენას და განაცდური საათების ანაზღაურებას ითხოვს ყოფილი საქმის მწარმოებლი მაია მაისურაძეც, რომლის შტატი გაუქმდა.

ახალციხის ციხეზე რეორგანიზაციის შესახებ თანამშრომლები 2018 წლის დეკემბერში გააფრთხილეს. რეორგანიზაცია 2019 წლის ხუთ აპრილს დასრულდა.

[თორნიკე ზაზაძე, ახალციხე]