ახალციხის უნივერსიტეტში 432 ადგილი თავისუფალი დარჩა

ერთიანი ეროვნული გამოცდების საბოლოო შედეგების თანახმად, რომელიც 25 აგვისტოს გამოცხადდა, 2012-2013 სასწავლო წელს მთელი საქართველოს მასშტაბით სტუდენტი გახდა 24 501 აბიტურიენტი, რაც დარეგისტრირებული აბიტურიენტების რაოდენობის 71%-ს შეადგენს.

ახალციხის სახელმწიფო სასწავლო უნივერსიტეტში 2012-2013 სასწავლო წლისათვის ბაკალავრიატში 740 ვაკანტური ადგილი გამოცხადაა. საბოლოო მონაცემებით, წელს ბაკალავრიატში 283 აბიტურიენტი, ხოლო ქართული ენის მოსამზადებელ პროგრამაზე 25 ახალგაზრდა ჩაირიცხა.

ახალციხის სახელმწიფო სასწავლო უნივერსიტეტის რექტორის მოადგილის ნიკოლოზ ახალკაცის თქმით, უნივერსიტეტის ადმინისტრაცია წელს მეტი სტუდენტის ჩარიცხვას არც ელოდა, თუმცა ვაკანტური ადგილები მაინც გამოაცხადეს: ”სტუდენტების დაახლოებით იგივე რაოდენობას ველოდებოდით, რაც შარშან იყო”.

უნივერსიტეტში ყველაზე მეტი სტუდენტი წელს განათლების, ჰუმანიტარულ და სოციალურ მეცნიერებათა ფაკულტეტზე ჩაირიცხა.

ადმინისტრაციაში ამბობენ, რომ აბიტურიენტთა მაღალი ინტერესი ისტორიის სპეციალობაზე დაფიქსირდა: ”იმის გამო, რომ გასულ წელს იურიდიულ ფაკულტეტზე ბარიერმა 10 ქულით აიწია, წელს სულ 17 აბიტურიენტი ჩაირიცხა, თუმცა, 70 ადგილი იყო გამოცხადებული”.

ახალციხის სახელმწიფო სასწავლო უნივერსიტეტში მიღება სამაგისტრო და პროფესიულ პროგრამებზეცაა გამოცხადებული. რამდენი სტუდენტი ჩაირიცხება აღნიშნულ პროგრამებზე, 1 ოქტომბერს გახდება ცნობილი.

[თამარ თოთაძე, ახალციხე]