ახალციხელი სტუდენტების პროტესტი

საპროტესტო მსვლელობა ახალციხის სახელმწიფო სასწავლო უნივერსიტეტის პირველი კორპუსიდან, დღის 2 საათზე დაიწყო. 50-მდე სტუდენტმა პატიმართა წამების ამსახველი ფაქტები გააპროტესტა.

არ აწამო! არა წამებას! დავიცვათ პატიმრების უფლებები! დაისაჯოს დამნაშავე! პატიცი ეცით ადამიანის უფლებებს! - ამ ლოზუნგებით მსვლელობა უნივესიტეტის მეორე კორპუსისკენ გაგრძელდა, რის შემდეგაც აქციის მონაწილეებმა ქალაქის ცენტრალური ქუჩების გავლით პოლიციის შენობასთან გადაინაცვლეს. აქციაზე სტუდენტებმა სიმბოლურად ცოცხებიც დაწვეს.

”ახალციხელი სტუდენტები ამ აქციით სოლიდარობას ვუცხადებთ ჩვენს თანამოქალაქეებს. მართალია ცოტა დაგვვაგვიანდა, მაგრამ მთავარია ჩვენი მხარდაჭერა მაინც გამოვხატეთ”, - ამბობს ახალციხის სახელმწიფო სასწავლო უნივერსიტეტის მესამე კურსის სტუდენტი.

აქციის მონაწილეების თქმით, დღევანდელი აქცია აპოლიტიკურია და ამით ისინი, მხარს ყველა იმ ადამიანს უჭერენ ვინც ამ ფაქტების მსხვერპლი გახდა.

”შეიძლება ნებისმიერი ჩავარდეს მსგავს სიტუაციაში. პასუხი უნდა აგოს ყველა პიროვნებამ, ვისაც მსგავს საქმეში წვლილი მიუძღვის და ვისაც მცირედი დანაშაულიც კი აქვს ჩადენილი. ყველა უნდა დაისაჯოს”, - ამბობს ახალციხის სახელმწიფო სასწავლო უნივერსიტეტის მეორე კურსის სტუდენტი ირინა კახაძე.

სტუდენტებმა პოლიციის შენობის მიმდებარე ტერიტორიიდან ავტოსადგურიკენ გადაინაცვლეს, სადაც დღევანდელი აქცია დასრულდა. აქვე მომდევნო საპროტესტო გამოსვლაც დაანონსდა. აქცია ხვალ 12 საათზე ისევ ახალციხის სახელმწიფო სასწავლო უნივერსიტეტის პირველი კორპუსიდან დაიწყება.

”ყველამ კარგად ვნახეთ ის ვიდეოები, ის შემზარავი ფაქტები. ამიტომ ჩვენმა სტუდენტურმა ჯგუფმა გადავწყვიტეთ გამოვსულიყავით და სოლიდარობა გამოგვეცხადებინა პატიმრებისთვის. არ ვაპირებთ გაჩერებას, სანამ ყველა დამნაშავე არ დაისჯება. ჩვენც პატიმრები ვართ, ასეთი რამ გარეთაც ხდება და გვინდა, რომ ჩვენი გამოსვლებით ჩვენს ქალაქშიც გამოვხატოთ პროტესტი”, - გვითხრა პირველი კურსის სტუდენტმა ნიკო გურგენიძემ.

[თამარ თოთაძე, ახალციხე]