ძალადობის წინააღმდეგ მიმდინარე კამპანიას სტუდენტები შეუერთდნენ

ტრანსფარანტებითა და მაისურებით: "არა ძალადობას", სტუდენტებმა სამცხე–ჯავახეთის სახელმწიფო უნივერსიტეტის პირველი კორპუსიდან ქალაქის ცენტრალურ პარკამდე მსვლელობა მოაწყეს.

მსვლელობას ორგანიზება სამცხე–ჯავახეთის სახელმწიფო უნივერსიტეტის სტუდენტურმა თვითმმართველობამ გაუწია.

„მსგავსი აქციების გამართვა მნიშვნელოვანია თუნდაც იმიტომ, რომ ინფორმაციის გავრცელებაა და ძალადობის აღმოფხვრაში გარკვეული როლი ამ კამპანიასაც აკისრია“, – ამბობს სტუდენტური თვითმმართველობის პრეზიდენტი შოთა ნარიმანიშვილი.

მსგავსი აქციები დღეს საქართველოს ყველა სტუდენტურ ქალაქში მოეწყო.

შინაგან საქმეთა სამინისტრომ, სხვა სახელმწიფო უწყებებთან ერთად, აშშ-ს საელჩოს მხარდაჭერით, ოჯახში ძალადობის წინააღმდეგ ბრძოლის სოციალური კამპანია „არა ძალადობას!“ 25 ნოემბერს დაიწყო. სოციალური კამპანიის მიზანი საზოგადოების ცნობიერების ამაღლებაა ოჯახში ძალადობის შესახებ და ამ პრობლემის დასაძლევად საზოგადოების ჩართულობის აუცილებლობის ხაზგასმა.

[თამარ თოთაძე, ახალციხე]