შემაჯამებელი ღონისძიება ინგლისური ენის შემსწავლელთათვის

პირველ კურსდამთავრებულებს სერთიფიკატები და საჩუქრები ამერიკის საელჩოს საზოგადოებასთან ურთიერთობის განყოფილების უფროსმა მაიკლ ტერნერმა გადასცა.

პროგრამის სრული კურსი ახალციხეში 26-მა მოზარდმა გაიარა. ჯგუფი სოციალურად დაუცველი ბავშვებით იყო დაკომპლექტებული.

- ”ბავშვები ინგლისურ ენას დაეუფლნენ და ლიდერული უნარ-ჩვევები გამოიმუშავეს. ასევე გაეცვნენ ამერიკულ კულტურას და ჰქონდათ საშუალება ამერიკელებთან უშუალო ურთიერთობისაც”, - განაცხადა პროგრამის პედაგოგმა შორენა მერაბიშვილმა.

”ინგლისური ენის შესწავლის ხელმისაწვდომობის სასტიპენდიო პროგარმას” ამერიკის საელჩო აფინანსებს. პროგრამა საქართველოს რვა ქალაქში ხორციელდება. ახალციხეში კი ორი წელია რაც მიმდინარეობს.

- ”ძალიან ბედნიერი და მოხარული ვარ, რომ მოსწავლეებმა წარმატებით დაასრულეს კურსი. საქართველოს და ამერიკის ურთიერთობა ძალიან მნიშვნელოვანია”, - განაცხადა ამერიკის საელჩოს საზოგადოებასთან ურთიერთობის განყოფილების უფროსმა მაიკლ ტერნერმა.

”ინგლისური ენის შესწავლის ხელმისაწვდომობის სასტიპენდიო პროგრამა” ახალციხეში მომავალშიც გაგრძელდება. უკვე სხვა 26 მოსწავლე შეძლებს უფასოდ დაეუფლოს ინგლისურ ენას.

[ნინო ბერიძე, ახალციხე]