კონფერენცია Onlin-რეჟიმში

”ხუთშაბათს 30 აგვისტოს, 19:00 საათიდან 20:00 საათამდე, ახალციხის მუნიციპალიტეტის FACEBOOK-ის ოფიციალურ გვერდზე, ერთი საათის განმავლობაში, თქვენთვის საინტერესო შეკითხვებს, ახალციხის მუნიციპალიტეტის გამგებელი გელა დემეტრაძე უპასუხებს.
გთხოვთ იაქტიუროთ!!!
გთხოვთ, გააზიაროთ აღნიშნული განცხადება და მიაწოდოთ ინფორმაცია თქვენს მეგობრებს, ეს დაგვეხმარება კონფერენციის ნაყოფიერად და ყველასათვის საინტერესოდ ჩატარებაში.
შემოგვიერთდით!!!” - ამ ინფორმაციას მუნიციპალიტეტის ოფიციალური ფეისბუქის გვერდი რამდენიმე დღეა ავრცელებს.

ახალციხის მუნიციპალიტეტის Facebook-ის ოფიციალური გვერდი პროექტის ”გამჭვირვალე თვითმმართველობის” ფარგლებში გააქტიურდა. როგორც პროექტის მედია-კოორდინატორი ჯაბა ნათენაძე ამბობს, გააქტიურებამდე გვერდს 61 მოწონება ჰქონდა, ახლა კი ეს ციფრი 1774-ს აღწევს. პროექტის მიზანი ადგილობრივი თვითმმართველობის მუშაობის ეფექტურობისა და გამჭვირვალობისა და მოქალაქეთა ჩართულობის გაზრდაა. პროექტი USAID-ის დაფინანსებული ”დემოკრატიული მმართველობა საქართველოში” პროგრამის გრანტის ფარგლებში ხორციელდება.

როგორც ჯაბა ნათენაძე ამბობს, კონფერენცია ხვალ პირველად გაიმართება და სამომავლოდ სისტემატურ ხასიათს მიიღებს: ”შემოსულ კითხვებს პასუხებს ის პირები გასცემენ, ვისთან მიმართებაშიც ყველაზე მეტი კითხვა იქნება”.

ნათენაძის თქმით, ფეისბუქის გვერდმა გაზარდა მოსახლეობის ინფორმირულობა მუნიციპალიტეტში მიმდინარე მოვლენებთან დაკავშირებით. გარდა ამისა, მოქალაქეებს საშუალება აქვთ სასურველ კითხვებზე პასუხები ოპერატიულად მიიღონ: ”ჩვენ გვინდა რომ გავაადვილოთ კავშირი. ასევე, გამოხმაურება აქვს ხშირად საზღვარგარეთიდან და კითხულობენ სად არის ეს მხარე. ამიტომ, ვფიქრობ, რომ ეს კარგი სასუალებაა ტურისტული კუთხითაც”.

ამ ეტაპზე გვერდზე ძირითადად მუნიციპალიტეტში მიმდინარე ინფრასტრუქტურული პროექტების ამსახველი ფოტო და ვიდეო მასალა და ახალციხის ციხის გახსნის ამსახველი ფოტო-ვიდეო და ტექსტური მასალები დევს.

არის რამდენიმე გამოკითხვაც, სადაც ჯერ პასიურობა შეინიშნება. მოქალაქეთა შეკითხვები ოფიციალურ გვერდზე ჯერ-ჯერობით არ ჩანს. გვერდი მიმდინარე წლის 17 იანვარსაა შექმნილი.

[ნინო ნარიმანიშვილი, ახალციხე]