'არა ძალადობას' – სოციალური კამპანია ახალციხეში

"არა ძალადობას" – ასე ეწოდება სოცაილურ კამპანიას, რომელსაც შინაგან საქმეთა სამინისტრო მიერ მთელი საქართველოს მასშტაბით აწარმოებს. შსს–ს თანამშრომლები დღეს სტუდენტებს ესაუბრნენ.

როგორც შეხვედრაზე აღინიშნა, სამცხე–ჯავახეთი ამ მხრივ მშვიდი რეგიონია და ოჯახში ძალადობის ფაქტები ნაკლებად ხდება.

შეხვედრაზე ასევე აღინიშნა, რომ ძალადობა დასჯადია და მოქალაქეების სამართალდამცველებთან თანამშრომლობა აუცილებელია, იმისთვის, რომ მოხდეს ძალადობის აღკვეთა და მსხვერპლის დახმარება.

"ამ შეხვედრის მიზანია ერთად ვუთხრათ "არა ძალადობას“. ეს არის პრევენციული ხასიათის კამპანიაა, რომელიც ემსახურება ახალგაზრდების ინფორმირებულობას", – ამბობს შსს–ს სამცხე–ჯავახეთის სამხარეო მთავარი სამმართველოს ახალციხის რაიონული სამმართველოს ინსპექტორ–გამომძიებელი ნონა გიქოშვილი.

ოჯახში ძალადობის წინააღმდეგ მიმართულ სოციალურ კამპანიაში ჩართულია არასამთავრობო სექტორი. ძალადობისაგან დაცვის ეროვნული ქსელის წარმომადგენელი სამცხე–ჯავახეთში მარეხი კირთაძე ამბობს, რომ სტატისტიკის მიხედვით, სამცხე–ჯავახეთში ძალადობის ფაქტები არ გახშირებულა.

შეხვედრა კითხვა–პასუხის რეჟიმში გაიმართა. სტუდენტების კითხვებს სამცხე–ჯავახეთის სამხარეო მთავარი სამმართველოს უფროსი თეიმურაზ კალანდაძე და მისი მოადგილეები პასუხობდნენ.

სამცხე–ჯავახეთის სახელმწიფო უნივერსიტეტის სტუდენტის ალექსანდრე ბერიძის თქმით, ოჯახში ძალადობის პრევენცია მხოლოდ ამ კამპანიის საშუალებით ვერ მოხერხდება: "ეს მხოლოდ სტუდენტებისთვის და მოსწავლეებისთვის ტარდება, მაგრამ ძალიან ბევრი ადამიანია საქართველოში, რომლებსაც არ აქვთ ინფორმაცია ოჯახში ძალადობის შესახებ. ამიტომ აუცილებელია მათაც იცოდნენ და მოხდეს მათი ცნობიერების დონის ამაღლება".



[თამარ თოთაძე, ახალციხე]