დავით ზარიძე: სამცხე–ჯავახეთში ოჯახში ძალადობის შემთხვევები გახშირდა

შეხვედრა დღეს, 23 თებერვალს, ახალციხის დემოკრატიული ჩართულობის ცენტრში შედგა. პირველი სკოლის მოსწავლეებს, დანაშაულსა და პრევენციაზე დავით ზარიძე ესაუბრა.

საუბარი ძირითადად, არასრულწლოვანებში დანაშაულებებს და განრიდებას, სამართლებრივ პასუხისმგებლობას, წვრილმან ხულიგნობასა და ადმინისტრაციულ დარღვევებს, ასევე ოჯახში ძალადობას შეეხო.

როგორც შეხვედრის ორგანიზატორები ამბობენ, ღონისძიება არასრულწლოვანთა შორის დანაშაულის შემცირების პროფილაქტიკის მიზნით ჩატარდა. დავით ზარიძის თქმით, ბოლო პერიოდში ოჯახში არასრულწლოვნებზე ძალადობის სტატისტიკა მაღალია.

„ჩვენს არასრულწლოვნებში სამართლებრივი ცნობიერების ამაღლების მიზნით, ბევრ შეხვედრებს ვმართავთ, ეს კი იმან განაპირობა, რომ ბოლო პერიოდში განსაკუთრებით ოჯახში ძალადობის ფაქტები გამოვლინდა“, – ამბობს იურიდიული დახმარების ბიუროს უფროსი დავით ზარიძე და ამატებს, რომ ბიუროში ბოლო პერიოდში ოჯახში ძალადობაზე 25 საქმე შევიდა.

შეხვედრას, 20–მდე არასრულწლოვანი ესწრებოდა, რომლებიც ძირითადად ოჯახში ძალადობისა და არასრულწლოვნებში ხულიგნობის საკითხით დაინტერესდნენ.

„საინტერესო შეხვედრა იყო, თუმცა ყველაზე მეტად ოჯახურმა ძალადობამ დამაინტერესა, რადგან ვთვლი, რომ ეს დღეს ყველაზე აქტუალური თემაა და მეტი ინფორმაციის მიღებაა კარგი იქნება“, – გვითხრა ლანა ტაბატაძემ.



[ლუბა გიორგაძე, ახალციხე]