ახალციხის მეექვსე საჯარო სკოლაში გათბობა ჩაირთო

მეექვსე საჯარო სკოლაში ელექტროღუმელები უკვე აიღეს, მეორე დღეა სკოლა ცენტრალური გათბობით თბება. დირექტორის მოვალეობის შემსრულებელი ეკა დალალიშვილი ამბობს, რომ სკოლაში ბუნებრივი აირი გუშინ, 4 დეკემბერს ჩაირთო.

„სკოლაში ცენტრალური გათბობა უკვე გამართულია. გუშინ სისტემა მთელი ღამე ჩართული დავტოვეთ, რომ დღეს კარგი სითბო ყოფილიყო, – ამბობს ეკა დალალიშვილი და ამატებს, რომ მეექვსე საჯარო სკოლაში სწავლა ხვალ, შაბათსაც იქნება: გაკვეთილები ხვალაც ჩატარდება იმ ცხრილით, რომელი დღეც გაცდა“, – ამბობს დალალიშვილი.

შეგახსენებთ, რომ მას შემდეგ რაც ახალციხეში ზამთრის სეზონი დაიწყო მეექვსე საჯარო სკოლაში ელექტროღუმენებით თბებიან. მიმდინარე წელს განათლების სამინისტროს საგანმანათლებლო და სამეცნიერო ინფრასტრუქტურის განვითარების სააგენტომ შეშაზე მომუშავე ცენტრალური გათბობა გაზზე გადაიყვანა და შენობაში გაზის შესაყვანად ტენდერი გამოაცხადა. თუმცა ტენდერი ჩავარდა და სკოლაში გაზის შეყვანა ვეღარ მოხერხდა.

ჯერ კიდევ ორი კვირის წინ „სამხრეთის კარიბჭეს“ სსიპ საგანმანათლებლო და სამეცნიერო ინფრასტრუქტურის სააგენტოში განუცხადეს, რომ გაზის კომპანიასთან ხელშეკრულება 24 ნოემბერს გაფორმდებოდა, რის შემდეგაც აღნიშნული კომპანია მეექვსე საჯარო სკოლაში გაზს 25 ნოემბერს ჩართავდა.

[მანანა სარაშვილი, ახალციხე]