მეექვსე საჯარო სკოლაში გათბობას დღეს ჩართავენ

ამ დრომდე ახალციხის მეექვსე საჯარო სკოლაში ელექტროღუმელებით თბებიან. სიცივის გამო სასწავლო პროცესი რამდენიმე დღით შეწყდა კიდეც. დღეს სკოლაში მოსწავლეების ნაწილი მივიდა და გაკვეთილებიც ტარდება. დღის ბოლომდე კი გათბობის სისტემის ამუშავებას ელოდებან.

„სასწავლო პროცესი ჩვეულებრივად მიმდინარეობს, ყველაფერი მოწესრიგებულია, გათბობის სისტემას დღეს აღადგენენ“, – ამბობს დირექტორის მოვალეობის შემსრულებელი ეკა დალალიშვილი.

შეგახსენებთ, რომ მეექვსე საჯარო სკოლაში ცენტრალური გათბობა სამი წლის წინ დამონტაჟდა. სისტემა შეშაზე მუშაობდა, მიმდინარე წელს კი განათლების სამინისტროს საგანმანათლებლო და სამეცნიერო ინფრასტრუქტურის განვითარების სააგენტომ ცენტრალური გათბობა გაზზე გადაიყვანა და შენობაში გაზის შესაყვანად ტენდერი გამოაცხადა. თუმცა ტენდერი ჩავარდა და სკოლაში გაზის შეყვანა ვეღარ მოხერხდა.

ჯერ კიდევ ორი კვირის წინ „სამხრეთის კარიბჭეს“ სსიპ საგანმანათლებლო და სამეცნიერო ინფრასტრუქტურის სააგენტოში განუცხადეს, რომ გაზის კომპანიასთან ხელშეკრულება 24 ნოემბერს გაფორმდებოდა და 25 ნოემბერს კომპანია მეექვსე საჯარო სკოლაში გაზს ჩართავდა. თუმცა, პროცესი ერთი კვირით გახანგრძლივდა.

[მანანა სარაშვილი, ახალციხე]