ვარძიის ტაძრის მხატვრობის რესტავრაციის პროცესს „მონოლით ჯგუფი“ დააფინანსებს

დღეს საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ანთიძემ, კომპანია "მონოლით ჯგუფის" დირექტორმა ზაზა იჩქიტიძემ, ძეგლთა კვლევისა და კონსერვაციის ცენტრის გამგეობის თავმჯდომარემ მანანა იოსავამ ვარძიის კლდეში ნაკვეთი ქალაქის სამრეკლოს ტერიტორიაზე ხელი მოაწერეს ხელშეკრულებას, რომლიც ფრესკების აღდგენითი სამუშაოებისთვის საჭირო სახსრების გამოყოფას ითვალისწინებს.

კულტურული მემკვიდრეობის სააგენტოს ცნობით, კულტურული მემკვიდრეობის დაცვის ეროვნული სააგენტოს მოღვაწეობის ისტორიაში, კომპანია „მონოლითი ჯგუფთან“ გაფორმებული ხელშეკრულება კულტურული მემკვიდრეობის ძეგლების რეაბილიტაციისა და რესტავრაციის პროცესში ფინანსური კუთხით კერძო სექტორის ჩართვის პირველი პრეცედენტია, თუ არ გავითვალისწინებთ ფონდი „ქართუს“ მასშტაბურ თანამონაწილეობას, რომელიც სააგენტოს ერთე-ერთი უმთავრესი ფინანსური დონორი ორგანიზაციაა.

XII საუკუნის კედლის მხატვრობის რესტავრაციის მე-3 ეტაპზე, ისე როგორც განვლილ ეტაპეზე, თბილისის სამხატვრო აკადემიის კონსერვატორ-რესტავრატორების ჯგუფი იმუშავებს, რომელმაც ხანძრის შემდეგ დაზიანებული ფრესკების აღდგენა ლონდონის კურტოს ინსტიტუტის სამეცნიერო ჯგუფის წევრებთან ერთად დაიწყო. ადგილზე განხორციელდა ფრესკების აღწერა-შეფასება. გაკეთდა სხვადასხვა სახის ტესტები, რის შემდეგაც ერთობლივად შემუშავდა სარესტავრაციო მეთოდოლოგია და დაიგეგმა კედლის მხატვრობის გადაუდებელი გაწმენდითი სამუშაოები.

"პროცესის დასრულების შემდგომ კულტურული მემკვიდრეობის სააგენტო რესტავრატორთა ჯგუფისგან პრევენციული ღონისძიებებისთვის რეკომენდაციებს მიიღებს, რაც უახლოეს მომავალში ღვთისმშობლის მიძინების ტაძრის ინტერიერში ხანძარსაწინააღმდეგო სისტემის, ჰაერის გამწმენდის, ტენიანობის და ტემპერატურის დარეგულირებისა და სპეციალური განათების სისტემის მოწყობას გულისხმობს", – აცხადებენ სააგენტოში.




[sknews.ge]